Shillong, Jylliew 30
Ha ka step jong ka Lah Sngi U Blei, ka 30 tarik u Jylliew 2025, ki briew jong ka tnat Shillong Municipal Board (SMB) ryngkat bad ki bor pynïaid District ki la leit ban kyndang naphang ïa ki nongdie madan ha Khyndai Lad, Police Bazaar, Shillong kiba shong dukan khlem da don ïa ka Certificate of Vending (COV), ba la ai da ka Shillong Municipal Board (SMB).
Ïa kane ka jingkyndang la sdang naduh ka por 9 baje eiei mynstep. Ka jingkyndang ka long beit thik ïa kito kiba shongdie madan ki bym don ïa ka COV, katba ïa kiba shongdie madan ha Khyndai Lad kiba don ïa ka COV la ai por pat ba kin kynriah noh sha MUDA Parking Lot shwa ka 22 tarik u Naitung (July).
Kane ka sienjam ba la shim da ki bor district bad ki briew na ka tnad SMB ka dei ka rai jong ka Sorkar Jylla hadien ba ka la pynbna ïa ka Khyndai Lad kum ka ‘No Vending Zone’ kaba lah ban wanrah ïa ka jingkylluid ban ïaid ki kali na katei ka surok. Nangta, ka jingthmu ka Sorkar Jylla ban pynkynriah noh ïa baroh kiba shongdie madan na Khyndai Lad ka dei namar ban pynurlong ïa ka jingthmu ban pynkylla dur ïa ka Khyndai Lad kum ka jaka ïaid kjat ki paidbah bad ka Music Hub ban khring ïa kiba wan kai sha nongbah Shillong.
Ha kane ka sngi ba ki bor district bad SMB ki la leit ban kyndang naphang ïa ki dukan bym don ïa ka COV ka la mih ka jingïania ka jur katta-katta bad ki nongshong die madan, namar ba ki nongshongdie madan kim treh ban mih noh na katei ka jaka.
Ka la poi ruh ka jingïapynibor hapdeng ki nongshongdie madan ba ki bor district namar ba ki paidbah nongshongdie madan ki la pyneh beit triang ban ym mih na Khyndai Lad, da kaba ong ba kane ka dei ka jaka ba ai ja ïa ki bad ban bsa ïa ka ïing ka sem. Ka la mih ruh ka jingbitar ïa kiba shongdie madan da kaba kynnoh ba ki wan leh da ka bor bad pyrta ‘ngin nym kynriah da lei-lei ruh em na Khyndai Lad sha MUDA.
“Nyngkong na ka liang ki bor District bad ka tnad Municipal ki la leit ban peit shwa ïa kiba shongdie madan ha Khyndai Lad da kaba ong ba kin sngewbha ban lum noh ïa la ki tiar lada kim pat don ïa ka COV ha kaba ym shah shuh ba kin dang shong die madan artad ruh da kaba byrngem ba lada kim ngeit kin wan biang ban rah ïa ki tiar jong ki.”
Na kane ka jingsdang ban kyndang ïa ki dukan die madan ha Khyndai Lad, na ka liang kiba shongdie madan baroh ki la pyneh triang ban nym kynriah. Kumta ki bor District bad ka tnad Municipal kim banse ban lum jubor ïa ki tiar ba ki die ban thep shapoh ka kali kaba la wan ap lypa ha Khyndai Lad. Nangta ka la mih shuh shuh ka jingïapynibor hapdeng kiba shongdie madan bad ki bor District ryngkat bad ki briew ka tnad Municipal ha kaba ki la kynnoh ba ki dei ki nongtuh ban shu wan shim beit jubor ïa ki tiar jong ki na ki dukan.
Wat la hapdeng ka jingïapynibor kiba shongdie madan, la don ruh kiba la kohnguh beit khlem da pyni nia ïa ki bor district da kaba lum beit ïa la ki tiar bad ban leit noh sha ïing namar ba kim pat don ïa ka Certificate Of Vending (COV).
Ki la don bun ki dukan kiba la lum noh ïa la ki tiar namar ba ki tieng ba lada kim lum noh ka tnad Municipal kan lum hi bad kin ym ïoh shuh ïa ki tiar ba ki die bad ki la don ruh kiba shongdie madan ki bym sngap bad pyneh beit, nalor kata kim shah ruh ïa ka tnad Municipal ba kin wan jrong-kti ïa la ki tiar.
Ki nongshong die madan ki la byrthen ruh da kaba ong khie leit weng shwa ïa ki briew na Them Metor bad sa ai ïa ki ïa katei ka jaka namar ki pynpaw ba ka jaka ba la ai ka sorkar ha MUDA kam long kaba bit ban shong ïa ki, namar ka long ka jaka kaba kynjah, nalor ba kam biang ki jaka leit shabar bad kiwei-kiwei de ki jingdonkam.
Hadien kata na ka liang ki bor district bad ki briew ka Municipal Board ki la sangeh shwa shipor ban kyndang ïa ki dukan ha Khyndai Lad bad bteng pat ha ka por kumba 5 baje eiei janmiet, ha kaba ki la phah lum noh ïa baroh kiba shongdie madan khlem ka syrnod COV. Kiba shah ktah na kane ka jingkyndang ka SMB ki kynthup ïa kiba shongdie syntiew, die ‘waidong, die sohriew bad kiwei-kiwei. Nangta la bthah ruh ïa kine ki bym pat don ïa ka COV ba kin sngewbha ban wan mih sha ophis ka Shillong Municipal Board (SMB) ban pynbiang noh ïa ki jingdonkam baroh.
