Shillong, Jylliew 30
Ka Urban Shopping Complex Association (USCA) ka la kyntu ïa ki bor pynïaid ka Meghalaya Urban Development Authority (MUDA) ban pyndam noh ïa ka rai ban paiñ ïa ki nongdie madan ha ka mala ba shajrong jong ka jaka pynïeng kali hynrei ban pyrkhing ïa ki ha ka mala kaba shapoh (jong ka jaka pynïeng kali) kumba la thmu ha kaba sdang.
“Ka seng ka kyntu jur ïa ki bor pynïaid ka MUDA ban pyndam noh ïa ka rai ha ban paiñ ïa ki nongdie madan ha ka mala ba shajrong jong ka jaka pynïeng kali hynrei ban pynkhing ïa ki ha ka mala kaba shapoh (jong ka jaka pynïeng kali) kumba la thmu bad shna ha kaba sdang. Kum kane ka sienjam la kumno-kumno kan ai lad ïa ki nongshong dukan ban pynhiar mynsiem na bynta ba kin im,” ong ka kyrwoh na u Secretary ka USCA, Bah Kynmawlang Lyngdoh.
Hashuwa, ka seng halor ka mat ba ïadei bad ka jingpynkynriah ïa ki nongdie madan, ka la pynpaw ïa ka jingbitar kaba jur ïa kito khamtam kiba treikam ha ki rud surok ka thaiñ Khyndai Lad ha kaba la pyntip ban pynkynriah noh ïa ki shapoh jong ka MUDA.
“Ka jingkynthup ïa ki ha ka mala ba shapoh jong ka jaka pynïeng kali kumba la shna ïa ki dukan ba marwei-marwei, kiba don haduh 200 tam, bad kaba kum kane ka jingthmu ka dei ka hok jong ki bor pynïaid ka MUDA, hynrei ka jingbym kwah jong ki nongdie madan – kiba ha kawei ka liang ki la jied ïa ka mala ba shajrong jong ka jaka pynïeng kali, ka long ka mat kaba sngewkhia shi kat dei,” u la ong.
U Bah Lyngdoh u la ong ba ïa ka jaka pynïeng kali ha mala ba shajrong, baroh shi katta ka dei kaba la buh na bynta ki kali jong ki ophisar ka MUDA, ki nongtrei, ki nongthied jingthied, ki nongdie dukan bad ki paidbah hynrei ka jingkylla ha ka nongrim ki nongdie madan jong ka thaiñ Khyndai Lad kiba la i mon ïa ka jaka ïeng kali ha ka mala ba shajrong kan ktah shi kat dei ïa ka jingwan ki nongthied jingthied shapoh ka Complex namar ka jingbym biang ki jaka pynïeng kali.
Halor kane, u la pynpaw ka jingsngewkhia ba kito kiba don dukan ha MUDA Shopping Complex kin sa ïakynduh jingeh ha ka liang ka ïoh ka kot jong ki ha kane ka Complex ïadie-ïathied.
Shuh shuh ka seng ka kyrshan radbah ïa ki bor distrik bad bor pulit kynthup ïa ka Shillong Municipal halor ka jingleh kaba ïahap jong ki ban pynduna ïa ka jingkhapngiah jong kine ki kam kiba la pynkha roi da ki nongdie madan – kaba la ktah shi kat dei ïa ki nongleit nongwan ha ka ïaid ka ïeng jong ki; ha ki jaka ïadie-ïathied kiba la khapngiah lypa.
