Shillong, Jylliew 30
Hadien kumba katto-katne bnai ka jingiehnoh jong u Bah Teiborlang Pathaw ïa ka kam President National People’s Party (NPP) Shillong City, kata shwa ka ilekshon MDC 2025, ka National People’s Party (NPP) Meghalaya Unit, ha ka 30 tarik u Jylliew, 2025, ka la pynskhem ïa ka kyrteng jong u samla rangbah u Bah Manroibha Kharpuri kum President bathymmai katei ka shnat treikam.
Ïa u Bah Manroibha la pynskhem bad pynkupburom da ki nongïalam ka NPP Meghalaya Unit ba kynthup ïa u Professor Donkupar War, General Secretary (Organisation) kum Adviser, u Bah Hamletson Dohling, Working President bad u Bah Jason S Mawlong, Secretary Incharge.
Ha ka jingïalang pynskhem ruh la sakhi da ka jingdonlang ki dkhot ka NPP Shillong City ba kynthup ïa u Bah Arnold M Lanong bad u Bah Sonny L Khyriem kum ki Working President, u Bah Lanangshngaiñ Pamthied kum General Secretary, ka Kong Damelari Ryntathiang kum Treasurer lem bad kiwei-kiwei de.
Haba kren sha ki lad pathai khubor, u Professor Donkupar War, u la ong ba kane ka sienjam ban pynkhlaiñ ïa ki jingtreikam ka seng ha ki Block bapher-bapher kiba hap ha ki bynta ka nongbah Shillong.
U la ong ba nangne shakhmat hi ka District Executive Committee jong ka Shillong City kan pyntreikam (Activate) ïa ki block executive committee jong baroh hynriew tylli kiba don hapoh ka Shillong City khnang ba kane ka jingtreikam jong ngi kan leit sha baroh ki shnat ban pynim biang ïa ka seng lyngba ka jingtreikam jong ka.
