Shillong, Jylliew 30
U Ardhendu Sekhar Mandal u la long kum lahduh ha ka “48th Meghalaya State FIDE Rating Chess Championship 2025” ba la pynïaid da ka East Khasi Hills District Chess Association (EKHDCA) hapoh ka jingkhmih jong ka Meghalaya Chess Association (M.C.A).
Kane ka lympung kaba la neh lai sngi lynter, ka la poi sha kaba kut ha ka 28 tarik u Jylliew ha ‘Khasi National Dorbar Hall kaba ha Mawkhar, Shillong ha kaba la wan shim bynta da 111 ngut ki nongïalehkai na kylleng ki district jong ka Jylla.
U Ardhendu uba la mihkhmat ïa ka EKHDCA, u la lah ban tam ïa u Silkam Sangma (GHCA) bad u Silseng N. Marak (SGHDCA) kiba la wan ha ka kyrdan ba-ar bad balai. Kiwei pat ki nongïalehkai kiba bat ïa ka kyrdan ba saw haduh shiphew ki long u Krusen D. Shira (GHCA), Amit Saraf (EKHDCA), Barbith M. Sangma (GHCA), Balseng N. Marak (SGHDCA), Marcosh N. Marak (GHCA), Bah Bonney Joanes Kharbani (WKHDCA) bad u Bah Pynmanroi Suting (JHDCA).
Ïa ka nam kum ki nongïalehkai ba kynsai ha la ki jong ki kyrdan ki long ha ka U-17 (Boys) la ïoh da u Ronyson Shyrkon (WKHDCA), U-17 (Girls) ka Amaziah Gapesa Marak (GHCA), U-13 (Boys) u Nikman G Momin (GHCA), U-13 (Girls) ka Peacyworkd B. Marak (EKHDCA), Best Unrated u Charming R. Marak (SWGHDCA) bad Best Veteran (above 50 years) u Dr. Challangga D. Sangma (GHCA).
Ïa ka nam Best EKHDCA la ïohpdiang da u Kevinson Jyrwa, Best Female (EKHDCA) ka Gargee Chakravarty, Best WKHDCA ka Lallomom Shyrkon, Best JHDCA Dapmon Bang, Best RBDCA u Khrawbor Makdoh, Best SGHDCA u Diego Derian Marak, Best SWGHDCA u Bensing G. Momin, Best EWKHDCA u Dibelson Kurbah, Best SWKHDCA u Banshanbor Marngar, Best GHCA u Pringprang Ch. Marak.
Ïa ki khusnam sha ki nongjop sa sam da u Bah Sanbor Shullai, MLA ka South Shillong kum u kongsan, kumjuh u D.B. Gunanka, Member Secretary ka SCSTE ha ka jingïadon lang ki dkhot ka M.C.A bad EKHDCA. Ki nongïalehkai ki la ïohpdiang da ki khusnam pisa ryngkat ki trophy bad ki syrnod.
