Khliehriat, Jylliew 30
Ka Narwan SCSC, Youngstar SCSC Huroi bad Tongseng SYSC ki la ïoh jingjop ha kaba sdang ïa ka lympung ïalehkai 3rd Division League Stage ba la pynïaid da ka East Jaiñtia Hills District Football Association (EJHDFA) ha madan Artificial Turf kaba ha Diengshynrum, Khliehriat.
Ha ka jingïakhun kaba nyngkong, ka Narwan SCSC ka la pynliem noh ïa ka Teilang SCSC Lummyrli da 3-0 kol. Kane ka nam jop ka la wan urlong lyngba ki kol ba la thep da u Shiborlang shadap (17), Jimris Langstang (61) bad Arhowni Shadap (72).
Ha ka jingïalehkai kaba bud, ka Youngstar SCSC Huroi ka la pynliem ïa ka Mookhep SCSC da 4-2 kol. U Wallamborlang Lamin Gadew u la thep ar kol na ka bynta ak Youngstar ha ka minit kaba 11 & 50, katba ïa kiwei pat la thep da u Defirent Surong (47) bad Rining Nongpoh (48). Na ka Mookhep la thep da u Dilas Dkhar (16) bad (75).
Haba phai sha kawei pat jingïalehkai, ka Tongseng SYS ka la jop da 2-0 kol ïa ka Umlong SCSC. Ïa kine la thep da u Niyos Suchen ha ka minit kaba 49 & 63.
Ïa kane ka lympung ïalehkai la plie da u Bah D.H. Malang ha ka jingdonlang u Bah Wilbert Nongtdu ryngkat ki nongïalam bad dkhot nongkitkam ka East Jaiñtia Hills District Football Association.
Ka jingïalehkai ha ka Sngi Ba-ar kan long hapdeng ka Sengkhynroo SC Umsatai pyrshah ïa ka Tuber Shohshrieh SSC ha ka por 11 baje mynstep, kumjuh ka Umrasong SCC ïa ka Evergreen SC Ladwahpung ha ka por 1 baje nohphai sngi bad ka Dkhiah East SC ïa ka Shymplong SCSC ha ka por 3 baje nohphai sngi.
