Shillong, Jylliew 30
Ka ïingbishar jong ka MK Lyngdoh, Special Judge (POCSO) ka East Khasi Hills lyngba ka hukum ba la pynmih ha ka 25 tarik mynta u bnai, ka la rai pynrem ïa u runar hapoh ka Special POCSO jong ka thanat Mawngap.
Ka ïingbishar ka la rai pynrem ïa une u runar ba la tip kyrteng kum u Teiboklang Wahlang, da kaba rai set patok haduh 25 snem ryngkat ka kuna T.50 hajar na ka bynta ka jingshah pynshitom hapoh ka Section 6 jong ka POCSO Act bad lada ym lah ban siew ïa ka kuna, un hap ban shah set patok sa hynriew bnai.
Nalor kane, une u runar u la shah rai pynrem ruh sa ar snem ha patok ryngkat ka kuna kaba long T.10 hajar na ka bynta ka jingshah pynshitom hapoh ka Section 506 Para I IPC bad lada ym lah ban siew ïa ka kuna, yn shah set patok sa 3 bnai.
Ïa kane ka mukotduma la tohkit da ka WP/SI L Kharjana jong ka DEF, kaba mynta ka don ha Women PS, East Khasi Hills, Shillong.
