Shillong, Jylliew 30
Ka jingshah tuh jong ki arshaka bad kiwei-kiwei ki tiar ka la nang ïai bteng na kawei ka sngi sha kawei pat. Kane ka la pynlong haduh ba kan pynshong syier ïa ki trai ïing, ki trai kali arshaka ne saw shaka kumjuh.
Katkum ka khubor kaba la ïoh na ki pulit la ong ba u Bah Welbert Lyngdoh Mawphlang u la ai ka jingujor ba hapdeng jong ka janmiet ka 26 tarik bad mynstep ka 27 tarik mynta u bnai, ki runar bym lah ban ithuh ki la tuh ïa ka arshaka jong u kaba don ïa u registration number ML05-AC-3631, kaba la pynïeng harud jong ka surok hajan ka jaka sah jong u ha Lumshyiap, Pdengshnong, Shillong.
Na ka liang jong u Bah Markordor Kharmalki ruh u la ai ka jingujor ba ha ka 26 tarik mynta u bnai, hapdeng ka 1 baje haduh 3 baje dang step, ki runar bym lah ban ithuh ki la tuh ïa ka arshaka jong u kaba don ïa u registration number AS01-DY-7037 na Laban, Last Stop, Shillong.
Kumjuh, na ka liang jong u Siddhart Chettri u la ujor sha ki pulit ba ha ka 26 tarik mynta u bnai, ha ka por 4 baje dang step, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-Z-7592 na ka thaiñ Rilbong, Shillong.
Ha kawei pat ka khubor, ka Kong Philaihun Syiemlieh ka la ai ka jingujor sha ki pulit ba ha ka 27 tarik mynta u bnai, ba ki runar bym lah ban ithuh ki la tuh ïa ka mobile tablet ka jong ka, kaba shongdor kumba T.30,000/- na ka hostel jong ka, kaba don ha Umkdait, Nongmensong, Shillong.
Katba na ka liang jong u Baraksal Ch Marak u la ai ka jingujor ba ha ka miet jong ka 25 tarik mynta u bnai, ki runar bym lah ban ithuh, ki la tuh haduh 500 kilo u cashew nuts bad ar tylli ki canopies na ka store room ka jong u, kaba don ha Chengkali ha South Garo Hills.
Na ka liang jong u Sectional Assistant jong ka PHE, Ampati ha South West Garo Hills u la ai ka jingujor ba hapdeng ka miet jong ka 25 bad 26 tarik mynta u bnai, ki runar bym lah ban ithuh ki la tuh ïa ki ar tylli tiar ilektronik kiba shongdor kumba T.42,000/- na ka Rongramgre Water Supply Scheme.
