Shillong, Naitung 01
Ka Meghalaya Power Workers’ Union (MPWU) da kawei ka sur ka la mynjur ban ai ka jingkyrshan bad jingïatylli ban pyrshah ha ka ban pynlong kam shimet ïa ka tnad bording da kaba deng ïa ki lama ïong ha ka 9 tarik mynta u bnai ha ki kynta long trei.
“Ka jingïalang jong ka MPWU kaba la long ha ka 20 tarik Jylliew, 2025 ha Shillong, ban khmih bniah ïa ki jingpynkhreh na bynta ka jingïakhih paidbah ha ka ri baroh kawei ha ka 9 tarik u Naitung, 2025 ka la shimkhia ïa ka jingpynbna ba la pynmih da ka Sorkar Meghalaya ha ka 7 tarik Jymmang, 2025 kaba khang ïa ki jingïakhih ha kano-kano ka tnad treikam ba kongsan kaba ïadei bad ka jingpynmih, jingpynlang, jingpynpoi ne jingsam katkum ka jinglong jong ka bording khnang ban khang lad ïa kano-kano ka jingpynthut ha ki kam shakri ba kyrkieh sha ki paidbah,” ong u General Secretary ka MPWU, Bah K.B. Chyne ha ka kyrwoh khubor.
Ha kajuh ka por, ka seng ka ai khublei ïa ka jingshimkhia kloi jong ka Sorkar ïa kane ka kam shakri kaba kongsan ha kaba ïadei bad ka bording, bad kyrmen skhem ba ka jingpynïaid kam ban pynlong kam shimet kan ym jia satia ha ka Jylla ym kumba long ha kiwei pat ki bynta jong ka ri naba ka bording ka dei ka tnad treikam kaba kongsan.
“Kumba la sngewthuh, ka bording ka dei ka bynta kaba kongsan ha ka jingim ba mynta bad ngi sngewthuh ba ka jingim kam lah ban treikam khlem ka bording. Ka jingbym don jong ka bording kan ktah jur ïa ka jinglong-jingman jong ka jingim bad buh jingeh ïa ka jingkiew shaphrang jong ki briew. Ka bording ka dei ka ‘Essential Service’ – ka seng ka kyrmen ba ka Sorkar Meghalaya kan ym ïapeiñ ha kino-kino ki kompeni shimet,” u la ong.
U la ong ruh ba ka MPWU kaba la ïasoh bad ka National Trade Union (da kaba burom ïa ka jingpynbna ba la kdew haneng) namar ka jingpyntreikam ïa Essential Service Maintenance Act, 1980 da ka Sorkar Meghalaya, ka seng kaba long ka nongshim bynta kaba don ka jingkitkhlieh, da kawei ka jingmut ka la rai ban pynpaw ïa ka jingkyrshan bad ka jingïatylli pyrshah ïa ka ban pynlong kam shimet ïa ka tnad bording ha India.
Halor kane, ka seng ka la rai ban deng ïa ka lama ïong ha ka 9 tarik u Naitung, 2025 ha ki kynta long trei kum ka dak ban kyrshan ïa ka National Coordination Committee of Electricity Employees & Engineers bad ka jingkyrshan ïa ka thup jingdawa ba 17 tylli ne ka ’17 Point Charter of Demands’ ba la thaw bad pdiang ha ryngkat ka jingmynjur lang da ki Central Trade Union.
“Ka MPWU ka ïeng ïatylli lang bad kito kiba pyrshah ban pynlong kam shimet ïa ka bording ha ri India. Ka ngeit skhem ba ki tnad treikam ba kongsan kum ka bording ki dei ban buh hakhmat eh ïa ka jingmyntoi bad jingbha jong ki paidbah ban ïa ka jingïohnong. Pynsangeh shi syndon ban pynlong shimet ïa ki kam ki jam, kyntiew ïa ka jingshai bad ïada ïa ka hok jong ki nongthied-nongpet,” u la ong.
Shuh shuh u Bah Chyne u la bynrap, “Ryngkat lang, ngi lah ban tei ïa ka lawei kaba mar katjuh bad kaba neh haba ïadei bad ka bording na bynta ka India.”
