Shillong, Naitung 01
Uwei u briew u la shah thombor da ka wait ha uwei pat u briew haduh ba u la mynsaw bad shah pynkit noh sha ka jaka ai jingsumar.
Katkum ka khubor kaba la ïoh na ki pulit la ong ba ka Kong Euniwom Dkhar ka la mudui da ka jingujor ba uwei u briew ba la tip kyrteng kum u Bud Biam, 73 snem ka rta, u la thombor ïa u para jong ka, u Rijonki Dkhar, da ka wait ha ka shnong Sahsniang, kaba hap hapoh ka thanat Raliang ha West Jaiñtia Hills.
Ha kane ka jingujor, la ong ba kane ka jingjia ka la jia ha ka 29 tarik mynshem bnai, ha ka por kumba 4.45 dang step, ha kaba utei u briew u la thombor da ka wait, haduh ba utei uba la shah thombor u la mynsaw jur bad la pynkit noh mar-mar sha ka jaka ai jingsumar. Na ka liang jong ki pulit ki la ïoh ban kem noh ïa utei u briew uba la thombor.
