Jowai, Naitung 01
Uwei u nongshong shnong ka Lapangap ïa uba la tip kyrteng kum u Lilut Joit u la mynsaw jur hadien ka jingshah thombor da ki jri siat sim bad shah bom shah tied ha ki Karbi.
Kane ka jingjia shah thombor ka la jia ha ka 1 tarik Naitung katba u Ma Lilut Joit u dang wan wad dawai ‘ñiangsohpet khun na ka shnong Lumlakhiat ka shnong kaba hap ban ïaid lyngba ïa ka shnong ba shong ba sah ki Karbi ka Langkeroi.
Haba ïathuh halor kane ka jingjia, u Ma Lilut u la ong ki don kumba 40-50 ngut ki Karbi kiba la ap thap ïa u ha ka Langkeroi bad ki la thombor ïa u da ki jri siat sim bad bom bad shoh haduh ba u la mynsaw jur.
Hadien ba u Ma Lilut u la poi ha shnong, ki nongshong shnong ha ka jingïalam u Waheh Shnong Ma Deimonmi Lyngdoh ki la pynkit noh mar-mar ïa u sha Namdong CHC na ka bynta ban pynïoh ïa ka jingsumar.
