Shillong, Naitung 01
Ka Lovlina Borgohain ka la khur ïa ka takma ksiar ha ka kyrdan ïakura jong ka 75kg ha ka Elite Women’s Boxing Tournament 2025, kaba la poi sha kaba kut ha Hyderabad ha ka Sngi Ba-ar.
Katba ka Nikhat Zareen kaba la jop ar sien ha ka pyrthei, ka la pynkut noh da kaba khur ïa ka takma rupa ha ka kyrdan jingkhia kaba 51kg, hadien ba ka la hap ban weng noh ïalade na ka jingïakhun phainal pyrshah ïa ka Jyoti namar ka jingmynsaw.
Ka Saroornagar Indoor Stadium ha Hyderabad ka la pynlong ïa kane ka lympung ïakura kaba la neh saw sngi ba la pynïasoh lang ïa ki nongïakura na kylleng jong ka ri India kiba la paw bad kiwei pat kiba nangkiew shaphrang ha kane ka jingïalehkai.
La pynlong ïa ki jingïakop ha kylleng jong 10 tylli ki kyrdan jing-khia. Ki nongïakura kiba la khur ïa ki takma ksiar bad rupa kin ïoh ka lad ban shah pyntbit ha ka elite national camp ha Patiala.
Ka Lovlina ka la jop ïa la ka kyrdan hadien ba ka Lashu Yadav, nongïa-kura ka liang pyrshah ka la weng noh ïalade na ka jingïakhun phainal, te kumta ka Borgohain ka la jop da ka walkover.
Ka Nitu Ghanghas kaba long ka nongjop ha ka Commonwealth Games bad World Championship ka la ïoh jingjop ha ka phainal jong ka 48kg da kaba pynliem ïa ka Chanchal da 4-1, katba ka paralok jong ka, ka Saweety Boora ka la jop ïa ka Alfiya da 5-0 na ka bynta ïohpdiang ïa katei ka takma.
Ka nongïalehkai Olym -pic ka Preeti Pawar ka la khur ïa ka takma ksiar ha ka kyrdan ïakhun kaba 54kg, katba ka nongjop barim jong ka pyrthei ka Ansambaro ka la bat ïa ka kyrdan ba ha khlieh duh ha ka 65kg.
Ka Babirojsana Chanu (57kg) ka la jop da 5-0 kol pyrshah ïa ka Kamaljeet Kaur ha ka jingïakhun ban khur ïa ka takma ksiar ha ka 57kg. Kumjuh ruh ka Prachi (60kg), ka Ritika (80+kg) bad ka Shivani (70kg) na Delhi ki la khur mar kawei ka takma ksiar.
