Jerusalem, Naitung:
Ka Israel ha ka Sngi Nyngkong ka la leit thombor biang sha kylleng ki bynta jong ka nongbah Gaza ha kaba 60 ngut ki la duh ei ia la ka jingim ha katei ka sngi. Nangta la ong ruh ba kane ka jingleit thombor jong ka Israel ka la jia ha kum kane ka por ba ka US ka dang pyrshang ban pynurlong ia ka jingiakren iasuk bad ka Hamas ban wanrah noh ia ka jingiasuk bad ka Israel.
La ong ba tang shi sngi hadien ba u Trump u la khot ban “Pynlong ïa ka jingïateh soskular ha Gaza, ban pynïoh biang ïa ki nongshah rahbor”, u Myntri ka tnat ïada jong ka Israel, u Ron Dermer, uba dei u nongshaniah jong u Myntri Rangbahduh ka ri, u Benjamin Netanyahu, u dang leit sha Washington, na ka bynta ban ïakren halor ka Iran kumjuh haba iadei bad ka thma ha Gaza.
La khmih lynti ba U Dermer, un sdang ïa ki jingïakynduh bad ki heh jong ka sorkar Trump, ha ka Sngi Ba-ar, ong ka tyllong khubor na Washington.
Hynrei ha madan ha ka jaka ba la khanglad da ka Palestine, ym shym la don dak ei ei ban pyni ba ka thma ka la sangeh noh. Kumjuh ruh ki shipai ka Israel, ki la pynmih ia ki hukum ban pynkynriah ia ki nongshong shnong ha ki distrik kiba heh ha ka thaiñ Shatei Lam Mihngi jong ka Gaza.
Ki tup- ki man jong ka Israel ki la leit rung sha ki jaka ba shaphang Mihngi jong ka Zeitoun ha ka nongbah Gaza bad ki la ther bom sha ki katto-katne ki jaka ha ka thaiñ Shatei Lam Mihngi jong katei ka nongbah, katba ki liengsuiñ ki la leit ther bom ym duna ïa ka saw tylli ki skul hadien ba ki la hukum ïa ki spah tylli ki longïing kiba rieh tngen hapoh ban mih noh.
Ka tnat shipai jong ka Israel ka la pynbna ba ka la ioh ban leit khynra ïa ki thong jong ka Hamas ha ka thaiñ Shatei Lam Mihngi jong ka Gaza, kynthup ïa ki jaka ba la bthah bad pynïaid, hadien ba la shim ïa ki lad ki lynti ban pynduna ïa ka jingma kaba lah ban pynmynsaw ïa ki riew paidbah.
