Khliehriat, Naitung 01
Ka Tuber Shohshrieh SSC, Umrasong SCC bad Dkhiah East SC ki la ïoh jingjop ha ka lympung ïalehkai Third Division Football League Stage ba la pynïaid da ka East Jaiñtia Hills District Football Association (EJHDFA) ha ka Sngi Ba-ar ha madan Artificial Turf kaba ha Diengshyn-rum, Khliehriat.
Ha ka jingïalehkai kaba nyngkong, ka Tuber Shohshrieh SSC ka la pynliem noh ïa ka Senkhynroo SC Umsalat da 2-1 kol. Ïa ki kol jong ka Tuber Shohshrieh la thep da u Shainly Shylla ha ka minit kaba 26 bad u Kyntulang Shylla (63), katba ïa ka shi kol jong ka Sengkhynroo la thep da u Jiwell Sympli ha ka minit ba 45.
Ha ka jingïakhun ba ar, ka Umrasong SCC ka la jop da 2-1 kol pyrshah ïa ka Evergreen SC Ladwahpung. Ïa ki kol jong ka Umrasong SCC la thep da u Dapkupar Pongrop ha ka minit kaba 36 bad Wellborn Pongrop (80+1). Katba ka Ever-green ka la pynphai kylla shi kol lyngba u Tenderly Dkhar (79).
Haba phai sha kawei pat ka jingïalehkai kaba khatduh, ka Dkhiah East SC ka la pynliem noh da 2-1 kol ïa ka Shymplong SCSC. Ïa ki kol jong ka Dkhiah East la thep da u Teilang Dkhar ha ka minit kaba 10 bad Jef Nongtdu (54), katba ka shi kol jong ka Shymplong la thep da u Dapmon Lapasam (25).
Ka jingïalehkai ha ka Sngi Balang kan long hapdeng ka Umrasiang UTD SC pyrshah ïa ka Youth SC Pyrtakuna ha ka por 11 baje mynstep, kumjuh ka Umtyra SC ïa ka R. Pohskur SC ha ka por 1 baje mynsngi bad ka Moonongtdu SC pyrshah ïa ka Iongkaluh SCSC ha ka por 3 baje nohphai sngi.
