Jowai, Naitung 01
Ki nongtrei jong ka Jaiñtia Hills Autonomous District Council (JHADC) hapoh ka lama JHADC-Staff Association, ki la kyrpad ïa u Myntri Rangbah ka Jylla Conrad K Sangma ba un pyllait noh ïa ka pisa kaba T.19 klur tyngka kumba u la dep ban kular lyngba ki lad pathai khubor.
Kitei ki nongtrei jong ka JHADC ki la pynkynmaw ba u Myntri Rangbah ka Jylla ha ka jingwan hiar jong u sha Jowai ha ka 21 tarik Jymmang, 2025 u la pynbna ban pyllait pisa 20 klur tyngka sha ka Jaiñtia Hills Autonomous District Council (JHADC) bad ba ka council ruh ka la dep ban siew tulop na ka bynta 2 bnai kata jong u bnai Risaw Naiwieng 2024 sha ki nongtrei jong ka.
Ha katei ka juh ka sngi, u Myntri Rangbah u la kular ruh ba hapoh ar ne lai taïew ka Sorkar Jylla kan sa pyllait sa T.19 klur tyngka sha ka JHADC hynrei haduh mynta ka JHADC ka khlem pat ïohpdiang ïa kata ka T.19 klur na ka Sorkar Jylla, la ong ki nongtrei ka JHADC.
Kumta ki la kyrpad ïa u Myntri Rangbah ba un pyllait noh ïa katei ka T.19 klur kumba u la kular khnang ba ka council kan ïoh ban siew ïa ka tulop ba sah jong ki nongtrei naduh u Nohprah 2024 haduh Jylliew 2025 bad ba kin ïoh ban lehkmen Behdeinkhlam kumjuh ba kin ïoh siew ïa ki ram ki shah ki jong ki.
