Shillong, Naitung 01
Kawei ka longkmie ka la lait da ka said na ka kti jong uwei u nongtuh, uba la pyrshang ban thombor ïa ka da ka tiar hadien ba ka la ïoh ban phet krad na la ïing.
Katkum ka khubor kaba la ïoh na ki pulit la ong ba ka Dr. Natasha Sangma ka la mudui da ka jingujor ba ha ka janmiet jong ka 29 tarik u bnai Jylliew, 2025, uwei u runar bym lah ban ithuh, u la mih kynsan na ka kamra thiah jong ka ïing jong ka, kaba don ha Hopkinson Road, Lachumiere, Shillong.
Ha ka jingujor ba la ai, la ong ba une u runar haba u la ïohi ïa ka, u la pyrshang ban thombor da ka tiar hynrei ha kane ka por, kane ka longkmie ka la ïohlad ban phet krad noh na kane ka kamra.
Kham hadien kata hadien ba une u runar u la phet noh na kane ka ïing, ka la lap ba u la dep ban tuh ïa ki ksiar (gold bracelet) bad shijur ki sohshkor kiba shongdor kumba T.1.5 lak.
Ha kaba ïadei bad kane, na ka liang jong ki pulit ki dang pynlong ka jingtohkit ban lap ïa ka jingshisha bad ruh ban thwet ïa utei u runar uba la donkti ha katei ka kam tuh.
