Shillong, Naitung 01
U Bah Paul Lyngdoh kum nongaiktien ka Sorkar MDA-2, u la ong ba ka Sorkar ka la leh ïa ka lynti kaba dei halor ka jingleit ban kyndang naphang ïa kiba shongdie madan ha Khyndai Lad hynnin ka sngi, namar ba ka long kaba ki la shimkhia bad bud katkum ka aiñ.
Ïa kane u Bah Paul u la pynpaw haba ïakren bad ki lad pathai khubor ha ka Sngi Ba-ar, ka 01 tarik u Naitung 2025.
U Bah Paul u la ong ba ka thong jong ka Sorkar Jylla ban pynkynriah noh ïa kiba shongdie madan na Khyndai Lad ka long ban pyllait ïa ka jingkhapngiah ïa ka sor Shillong bad khamtam ha ka bynta jong ka Khyndai Lad khnang ba ka jingïaid lynti kan long ban pynkylluid bad pyllait ïa kane ka jaka na ka jingkhapngiah.
U la ong ba ki nongïaid lynti baroh ki don hok ban pyndonkam ïa ki surok bad ka hok jong ki nongdie jingdie ha surok kim dei ban pynduh hok ïa kiwei pat ki nongpyndonkam ïa ka surok.
Halor katei ka jaka ha Khyndai Lad kaba la khapngiah na ka jingshong die madan ki paidbah, u Bah Paul u la ong, ba ki don ki nongñiah kali kiba dei hok ban pyndonkam ïa katei ka surok ban ïaid bad ki don ki nongleit jingleit da ka kjat kiba dei ruh ki nongpyndonkam ïa katei ka surok bad namar ka jingdon kiba shongdie madan ka la pynkhapngiah shibun ïa ki nongleit-nongwan.
“Katkum ka Town Vending Committee (TVC), ka la don ka jingïakren la shi snem tam eiei bad kane kam dei kaba la leh ha ka bor mar-mar da ka Sorkar, hynrei ngi la leh ha ka jingïasnoh kti bad ki nongdie jingdie surok bad ki nongïalam jong ki ruh ki la shim bynta ha kiba bun ki jingïalang kiba ju pynlong na ka por sha ka por. Kito ki jingïalang la pynlong da ka rukom kaba dei bad la thoh bad pynskhem bad ki la mynjur ruh ïa ki kyndon bad ki rai,” ong u Bah Paul.
U la bynrap ruh da kaba ong ba lada phi leit ban ïakren bad u CEO jong ka Shillong Municipal Board (SMB), un lah ban ai jingtip kham bniah shaphang ki jingïalang jong ka Town Vending Committee (TVC). Hynrei kaba la jia hynnin ka sngi ka long kaba sngewsih, kaba sngew lyngngoh, ha kaba ki heh sorkar ki la pyntip shai ba tang kito kiba don ïa ka COV ne ka Certificate of Vending kin shah ban bteng ïa ka jingdie jong ki.
Ka sorkar ka la ïaid katkum ki kyndon bad la ai por shuh shuh, hynrei hadien ba ka tarik ba khatduh ka la kut, wat la katta ka sorkar ka la pynkynriah ïa ka tarik haduh ka 22 tarik u Naitung ba baroh kiba shongdie madan ha Khyndai Lad kin kynriah noh sha khrum MUDA bad ki don 400 tylli ki jaka bathymmai ba la buh bad shna kyrpang na ka bynta kiba shong die madan, hynrei ki don khyndiat ngut eh kiba la pdiang ban kynriah sha ka jaka ba la shna kyrpang bad ki la long ruh kiba kloi ban pdiang ïa ki rai jong ka Town Vending Committee.
Shuh-shuh u Bah Paul u la ong ban kyntiew ïa ki ban kynriah sha ka jaka thymmai ha Meghalaya Transport Corporation (MTC), ka Sorkar ka la pynkhreh ban ai ka pisa T.10,000 kum ka jingïarap bad man uwei u nongdie un ïoh ka jingïarap T.2,000 man u bnai haduh san bnai ban ai jingkyrshan bad jingmyntoi ïa ki.
U la ong ba haba ïa dei bad kaei kaba la jia hynnin ka sngi, ka paw ba don ki ‘riew shim kabu kiba don da ki bynta ban hikai da ki agenda, hynrei ngan ym thew tang ïa ki nongdie hynrei ka paw ba don katto-katne ki nongïalam kiba ym kwah ba kane ka mat kan kut noh.
Ka sorkar pat ka long kaba kloi ban pynneh-pynsah ïa ka aiñ bad ka riti synshar. Mynta ka sngi la ïohi ba ki nongshong die madan ki la ïaid paidbah haduh hajan Secretariat ban ïakhih, kaba long kum ka jingïalum paidbah kaba la pynkheiñ ïa ka Section 163 jong ka BNS, la ong u Bah Paul.
“Ngi kwah ban pynkynmaw biang ba ka sorkar kan nym ailad ban pynkheiñ ïa ka riti synshar bad ka aiñ,” u la ong.
