Shillong, Naitung 01
Ka tnad ki kam pynroi sor ka Jylla ka la kular skhem bad pyntikna ban ïada ïa ki lad kamai jong ki nongdie madan ha ryngkat ban kyntiew ïa ka jinglong-jingman jong ka sor kaba beit ba ryntih bad kaba pynsuk na bynta baroh.
Ha ka kyrwoh na u Commissioner & Secretary ka tnad kam pynroi sor, la ong ba ïa ka Street Vendors (Protection of Livelihood and Regulation of Street Vending) Act, la mynjur ha u snem 2014 bad hadien kata, ka Sorkar Jylla ka la pynbna ïa ka Meghalaya Street Vendors (Protection of Livelihood and Regulation of Street Vending) Rules, 2022 bad ka Meghalaya Street Vendors (Protection of Livelihood and Regulation of Street Vending) Scheme, 2023.
Ha ka jingbud ryntih ïa kane, la thaw ïa ka Provisional Town Vending Committee (PTVC) jong ka Shillong ha ka 13 tarik u Risaw, 2022 katkum ka Rule- 5 jong ka Meghalaya Street Vendors (Protection of Livelihood and Regulation of Street Vending) Rules, 2022.
Kane ka komiti ka kynthup ïa ki dkhot na ka tnad Sorkar, seng nongdie madan, NGO, Dorbar Shnong bad kiwei. Ka PTVC naduh ba seng ïa ka, ka ju pynlong ïa ki jingïalang ba man ka por bad la ïashim bynta da ka Shillong Roadside Hawkers Association bad ka Meghalaya & Greater Shillong Progressive Street Vendors Association kumjuh.
U la ong ruh ba katkum ki kyndon jong ka skhim, ka PTVC ha kaba sdang ka la pynlong ïa ka jinglum jingtip ha kata ka jaka lyngba ki kor ka juk stad mynta (in-situ digital survey) na bynta ki nongdie madan kiba la don lypa hapoh jaka ka Municipal.
“Ïa kane ka jinglum jingtip la pynlong ha la ki jong ki kylla, kaba la sdang da ka ‘Pilot Survey’ ha Khyndai Lad bad hadien kata ha kylleng ki 22 tylli kiwei pat ki jaka ba la pyndep ha ka 16 tarik u Kyllalyngkot, 2024. Baroh ki nongdie madan kiba la lum jingtip ki don 1,400 ngut bad na kine 760 ngut ki dei ki nongdie madan kiba dei hok,” u la ong.
Ha kajuh ka por, ban ïaid shakhmat bad kiwei pat ki kam ba la pynbiang ha ka skhim, la jied ïa ka thaiñ Khyndai Lad na bynta ka kylla banyngkong jong ka jingpyntreikam bad la shim ïa ka jingpyntreikam ban pynbeit ïa ki jingdawa bad ki jingpyrshah ha kaba la thaw ïa ka Sub-Committee ban pynlong ïa ki jingbishar.
Ïa kane kajuh la pynlong ha ka 28 tarik u Rymphang, 3 bad 4 tarik u Lber, 2025 bad baroh ki jingdawa ba la ïoh ki long 87 tylli ha kaba la pynshisha ïa 62 tylli, katba 25 tylli pat kim shym la poi.
“La ai lad ruh ban sngap ïa kito ki bym shym la poi ha ka 25 tarik u Ïaïong, 2025 bad la pynduh noh ha ka 8 tarik u Jymmang, 2025. Ka jingdon jong ki nongdie madan baroh kiba la lum jingtip na bynta ka Khyndai Lad mynta ki long 457 ngut, ha kaba 407 ngut ki long kiba dei hok,” u la ong.
Na bynta ka thaiñ Khyndai Lad, ki jaka die jingdie ba la pynithuh ha shuwa ki long ka mala ba sha khrum jong ka jaka pynïeng kali ka MUDA, ka ‘Frontage’ jong ka MUDA Complex, bad ka jaka pynïeng kali ka SMB mar pyrshah ka SBI Main Branch.
Hadien kata, ha ka jingkyrpad na ka seng ki nongdie madan, ïa ka mala ba sha khrum jong ka jaka pynïeng kali ka MUDA la pyndam noh kum ka jaka die jingdie bad ïa ka mala banyngkong jong ka jaka pynïeng kali ka MUDA la pynbna kum ka jaka die jingdie. Hadien kata, kiba sah ki jaka jong ka Khyndai Lad la pynbna kum ka “No Vending Zone” da ka Sorkar.
Haba phai sha ka jingai ïa ki syrnot Certificate of Vending (CoVs) sha ki nongdie madan kiba dei hok jong ka Khyndai Lad, ka jingsam ïa ki syrnot ka la sdang naduh ka 2 tarik Jylliew, 2025 bad haduh mynta, haduh 251 tylli ki syrnot la dep ban ai na ki 407 ngut ki nongdie madan kiba dei hok bad kiba la ithuh ha ka thaiñ Khyndai Lad.
Ha kawei ka liang, ka PTVC ka la pynmih ïa ka jingpynbna paidbah ha ka 21 tarik Jylliew, 2025 da kaba kyrpad ïa ki nongdie madan ba khlem syrnot (CoV) kiba biang ban pynthylli ïa ki jaka ba ki shong hapoh 3 sngi bad ka jingsdang ban pynkynriah ïa kito kiba don CoV ka ban treikam naduh ka 22 tarik u Naitung, 2025.
Ka la don ruh ka jingpynbna paidbah naduh ka 25 – 28 tarik u Jylliew, 2025 naduh ka por 10:00 baje mynstep haduh ka por 9:00 baje mynmiet. Ka jingkyndang ban pynthylli ïa ki jaka jong ki nongdie madan ba khlem CoV ka la sdang ha ka 30 tarik Jylliew, 2025 ha ka por 8:15 baje mynstep ha ka thaiñ Khyndailad.
Lah ban kdew ruh ba ka jingpynbeit ïa ki kam die madan ha surok ka dei ka kam kaba eh kaba la shimkhia lang da ka Shillong Municipal Board, ophis Deputy Commissioner, bad ka tnad Pulit, katkum ki kyndon jong ka aiñ.
Ka kyrwoh ka ïathuh ba ka jingkyndang kaba la sdang ha Khyndai Lad ha ka 30 tarik Jylliew, 2025 ka pyni ïa ka jingsdang jong ka jingpyrshang kaba bteng ban pynkynriah ïa baroh ki nongdie madan kiba dei hok sha ki jaka die jingdie ba la buh kyrpang, katkum ka Meghalaya Street Vendors (Protection of Livelihood and Regulation of Street Vending) Rules, 2022.
Ïa kane ka jingkyndang yn pynjlan sha kiwei pat ki jaka ha kylleng ka nongbah bad kan bteng haduh ba la pynkynriah lut ïa baroh ki nongdie madan kiba la pynrung kyrteng bad kiba dei hok sha ki jaka ba la pynithuh.
“Da kaba buh jingmut ïa ka jingeh kaba la wanrah ïa ki nongdie madan namar ka jingpynkynriah, ka tnad ka la thaw ïa ka skhim ban ai ïa ka bai pynkynriah jaka kaba T.20,000 sha ki nongdie madan kiba don ïa ka syrnot (CoV) kaba biang, kaba kynthup ïa ka jingsiew hashuwa kaba T.10,000 bad ka jingsiew bnai kaba T.2000 na bynta san bnai ban wan,” ong ka kyrwoh na une u heh ophisar.
Lah ruh ban kdew ba ïa ka kam ba ïadei bad ka jingkyndang baroh kawei bad ka jingpynbeit ïa ka kam die jingdie ha surok la leh da ka tnad – la buddien man ka por da ka Ïingbishar High Court ba donburom, kumba la bthah da ka Public Interest Litigation (PIL) No. 9/2024 ba ïadei bad ki nongdie madan bad PIL No. 17/2021 haba ïadei bad ka dheng kali.
“Ka dei ka jingpyrshang jong ka tnad ban pyntikna ba ki lad kamai jong ki nongdie madan kin ïoh ka jingïada ha ryngkat ka jingkyntiew ïa ka jinglong sor kaba kham beit bad kaba pynsuk na bynta baroh,” pynkut ka kyrwoh.
