Shillong, Jylliew 30
Ka Meghalaya Athletics Association (MAA) ka la lah ban pynlong ïa ka jingpyrshang ban jied ïa ki nongïalehkai ha ka sien kaba nyngkong ha ka 28 tarik u Jylliew kaba long shi bynta ban pynkhreh ïa ka 39th National Games ka ban long ha u 2027 ha Meghalaya.
La pynlong ïa kane ka prokram na ka bynta ki khynnah kynthei bad shynrang ha West bad East Jaiñtia Hills District, ha kaba la sakhi ïa ka jingwan shim bynta jong 139 ngut nongïalehkai, kiba kynthup ïa 112 ngut ki shynrang bad 27 ngut ki kynthei.
Ïa kane ka jingïalehkai la khmih bad bishar bniah da ki 15 ngut ‘technical officials’, nalor ka jingkyrshan ba la ai da ki nongïalehkai barim kiba la ïarap mon sngewbha ban pynïaid ïa kane ka prokram.
Kane ka jingpyrshang ban jied nongïalehkai ka thmu ban wad bad jied ïa ki sap kiba don jingkyrmen ki ban mihkhmat ïa ka Jylla sha katei ka lympung ba heh duh jong ka ri. Ka bynta kaba bud jong ka jingjied la buh ban long ha ka 5 tarik mynta u bnai ha SAI Centre, NEHU, Shillong. Kane ka long na ka bynta ki khynnah ïalehkai na East Khasi Hills, West Khasi Hills, South West Khasi Hills bad Ri Bhoi districts.
