Shillong, Naitung 01
Ha ka nohphai sngi jong ka 01 tarik u Naitung 2025, ki nongïalam bad ki dkhot ka Meghalaya and Greater Shillong Progressive Hawkers and Street Vendors Association (MGSPHSVA) ka seng ki nongdie madan ki la leit ban tur sha Secretariat ban dawa na ka Sorkar Jylla ban pyntreikam ïa ka mat pynkynriah ïa ki sha ki jaka die jingdie ba la pynkhreh da ka sorkar katkum ki kyndon aiñ.
Ki paidbah kiba shongdie madan ki la wanrah ruh da ki plakad ha ryngkat ki jingthoh kiba ong “Ngi dawa ïa ka hok, bad pyntreikam ïa ka aiñ” nalor kiwei-kiwei de ki jingdawa.
Ka jingwan tur kynsan ki dkhot ka MGSPHSVA ka dei namar ka jingsngewbitar bad ban pyrshah jur ïa ka jingwan kyndang naphang ka tnad Municipal ïa ki nongdie madan ha Khyndai Lad ha ka Lah Sngi U Blei.
Ki nongdie madan ki la dawa ruh na ka sorkar ba ka dei ban lum kyrkieh ïa ka jingïalang jong ka Provisional Town Vending Committee (PTVC) ban pynbeit ïa kitei ki kynrum-kynram.
Haba kren sha ki lad pathai khubor, ka Kong Angela Rngad, Nongai jingmut ne Adviser jong ki nongdie madan ka la kynnoh ba kane ka jingwan kyndang naphang ki briew ka tnad Shillong Municipal Board (SMB) ka long beaiñ, da kaba ong ba kane ka la ktah lang ïa kiba shongdie madan kiba la ïoh ïa ka Certificate of Vending (COV) ne ka syrnod ban shongdie jingdie.
Ka la ong ba u Chairperson jong ka PTVC uba dei ruh u CEO jong ka Shillong Municipal Board (SMB), u la ai bor ban pynlong ïa ka jingkyndang ïa kiba shongdie madan khlem da ïaid katkum ka lynti kaba dei.
Nalor nangta ka la bynrap ruh da ka ong, ba khlem don mano-mano ba rai ban pynkynriah noh ïa ki shapoh khrum MUDA hynrei la shu rai shimet. Ka la ong ba wat ka rukom shna ïa ka jaka shapoh khrum MUDA ruh kam long shngaiñ ïa ki nongdie madan, da kaba dawa ba lada ki ai jaka shajrong kin kohnguh hynrei haba pynwandur ïa ka jaka ruh dei ban ïa pyrkhat lang bad ki nongdie madan namar ki kham sngewthuh ïa ka rukom kaba biang ban buh ïa ki mar ki mata jong ki.
Shuh shuh ka la banjur ruh da kaba ong ba ki nongshong die madan ki la leit mudui sha ka ïingkashari ban dawa pyntreikam ïa ka Street Vendors (Protection of Livelihood and Regulation of Street Vending) Act, 2014 bad ki la ïatreilang bad ka PTVC ban pyntreikam ïa katei ka aiñ. Hynrei ka jingleh jong ka SMB pat ka la long pyrshah ïa ka aiñ bad kan nang pynmih shuh-shuh ïa ki kynrum-kynram.
Na ka liang ka Kong Biolin Pyrtuh, President jong ka MGSPHSVA, ka la ong ba ka jingleh jong ka sorkar ka long lyndet. Ka la dawa ruh ba dei ban pynlong noh mardor ïa ka jingïalang ka PTVC ban shimkhia ïa katei ka mat bad lada jia ba ym shim la pyntreikam ryntih ïa ka aiñ kan long kaba don jingma bad kan pynmih ïa ki jingeh kiba bun.
“Ngi la dawa na ka sorkar ba ka laisen hi kan long beit kaba khuid kaba hok, kaba nyngkong ki ban ïoh ïa ka laisen ki dei beit ki briew kiba na ka Jylla Meghalaya bad kaba tam nangta pat ki lah ban ai sha ki briew ki bym dei ki nong Meghalaya kiba la sah slem ha ka Jylla, kiba la long ki nongshong shnong ka Jylla, hynrei ïa kane ka sorkar kam shym la pynsngap,” la ong ka Kong Biolin.
Ka la ong ba hynnin ka sngi ba wan kyndang naphang ki briew na ka Municipal Board bad ka jingmih ka jingkulmar bad kiba shongdie madan ka la long kum ka ding, da kaba kynnoh ba dei ma ki hi kiba wan ban thaw ïa ka jingkulmar.
Ka la pynpaw ruh da kaba ong, ba lada ka sorkar ka ai ka jaka kaba biang ïa ki nongshong die madan, ngi sngewkmen eh.
“Ngi la ïa phone ïa u Urban Minister, kata u Bah Sñiawbhalang Dhar hynnin hi ka sngi ban ïakren, hynrei u Bah Sñiawbhalang u khlem shim ïa ka phone, da kaba buh jingkylli ba balei um rah ïa ka phone haba u kular hi ban kren lada donkam?” ong ka Kong Biolin.
Hadien kumba katto-katne kynta eiei ba ki nongdie madan ki la ïeng ha khmat Secretariat bad kim shym la ïoh kano- kano ka jubab na ki bor ba halor, ki la sangeh noh ïa ka jingïakhih bad kin sa bteng pat lashai ka sngi.
