Shillong, Naitung 01
Ka kam tuh kam thiem ka dang ïai bteng na kawei ka sngi sha kawei pat. La sakhi ba ka jingshah prong tuh jong ki ïing ki sem bad ka jingshah tuh jong ki arshaka ka dang ïai jia na ka sngi ka sngi.
Katkum ka khubor na ki pulit la ong ba u Raju Das u la ai ka jingujor ba ha ka 27 tarik jong u bnai ba la lah, ha ka por kumba 3.15 janmiet, ki runar bym lah ban ithuh, ki la prong tuh hapoh ka ïing ka jong u, kaba don ha Laitumkhrah, Lumsohra, Shillong bad ban tuh ïa ki ksiar kiba shong dor kumba T.30,000/- bad ka pisa kaba long T.6,000/-.
Ha kawei pat ka khubor, u Bah Renaldy Budlang Jyrwa u la ai ka jingujor sha ki pulit ba ha ka step jong ka 29 tarik u bnai ba la lah, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-V-5513 na ka phyllaw jong ka jaka sah ka jong u kaba don ha Umpling Dongshaneng, Shillong.
