Shillong, Naitung 01
Ka Federation of Khasi Jaiñtia and Garo People (FKJGP) Sengkmie, hadien ba la ïoh jingtip shaphang ka jingshah shoh pynmynsaw jong uwei paradoh parasnam ha ki jaidbynriew Karbi kiba don kumba 50 ngut eiei katba u dang wan shim dawai ‘ñiangsohpet na ka shnong Lumlakhiat, ka la pynbitar lep ïa ka seng hi baroh kawei namar kum kitei ki jingjia ki la ju jia na ka por sha ka por kynthup ruh ïa ka jingshah lum khajna beaiñ ha kylleng ki jaka khappud bad ruh ka jingshah pynjulor ïa ki jingthung-jingtep ha ki jaka rep.
Ha ka kyrwoh khubor ba la pyllait da u Chief Organising Secretary ka FKJGP Sengkmie u samla Khrawkupar Nongsiej u la ong, ka jingïoh lad ban shim kabu jong kitei ki jaidbynriew Karbi ka dei na ka daw ba ki ïoh ïa ki jingïada ba pura na ki pulit Assam katba ki pulit jong ka jylla Meghalaya pat ki shu long tang kum ki nongpeitkai.
U samla Khrawkupar Nongsiej u la ong, dang ha kine ki khyndiat taïew ba la dep, ki Karbi ki la sdang ban kurup wat ïa ki jaka rep jong ki paid Khasi Pnar ha u Loom Pynthor kaba hap ha ka shnong Lapangap da kaba wan sher dara bad wanrah ïa ki kor ki bor ban thang light ha kaba ki la thaw ruh ïa ki ïing ki sem jong ki bad byrngem-byrsit ruh ïa ki nongshong shnong Lapangap ba kim dei ban wan ïuhkjat shuh ka katei ka jaka, ym tang katta katkum ki durkhih ba la ïoh da ka seng, ki jaidbynriew Karbi ki la pyndonkam ruh da ki kyntien khlem akor bad kyntien kheiñpoh ïa ki pulit jong ka jylla Meghalaya.
U la ong, ka FKJGP ka dap da ka jingsngewkhia ba ki bor Sorkar jong ka jylla Meghalaya pat ki dang ïoh thiah lyngngai wat haduh kane ka khyllipmat kaba mynta khlem da shim satia ïa kino-kino ki sienjam da kaba aidaw bad pyrshang ban thet-kti ha ka kyrteng jong kata ka ‘Kam Ïa Pynbeit Pud’ kaba dang ïaid shakhmat.
U samla Khrawkupar u la ong, kaba la pyndukha mynsiem shuh shuh ïa ka seng ka long ba ha ka 27 tarik Jylliew katba ki nongïalam jong ki kynhun sengbhalang bapher bapher na Ri Lum Jaiñtia bad ki nongïalam jong ka Synjuk ki Waheh Shnong West Jaiñtia Hills ki dang pyrshang ban pynsngew ha u Symbud Myntri Rangbah jong ka Jylla ba ki donkam ïa ki ophisar la ka long ha ka District Administration ne ha ki bor Pulit kiba dei ki paradoh ki parasnam kiba sngewthuh ïa ka ktien ka thylliej, kiba sngewthuh shisha ïa ka khia ka shon jong ki paidbah, phewse u Symbud Myntri Rangbah uba khmih ruh ïa ka tnat kam Pohïing ka Sorkar Jylla um shym la ailad satia ban kren ïa kata ka bynta da kaba u ong: “Kane ka dei ka kamram jong ka Sorkar, Phim lah satia ban ïakren hangne”. Ka jingkylli kaba mih mynta pat ka long ba kita ki bor ba dei khmih ïa ka aiñ kiba ka Sorkar Jylla ka la thung bad bujli da ki bym dei satia ki paradoh parasnam hato kila ai jingïada shisha ïa ki paid Khasi-Pnar ne ki shu long tang ki nongpeitkai namarba wat tang ïa ka ktien ka thylliej ruh kim sngewthuh satia, sa katno tam lei ïa ka jingkitkhlieh?
Ha kawei pat ka liang, ka FKJGP ka pynrem jur ruh ïa ka jingkren jong u Myntri uba khmih ïa ki kam jngohkai pyrthei uba la kynnoh ba ki sengbhalang kim dei ban pynlong jaka kura (Punching Bag) ïa ka Sorkar halor ka jingjia ha ka shnong Lapangap bad ki kam ïakajia khappud. Ka jingkylli kaba mih mynta pat ka long ‘Hato ka jingshah thombor pat kiba ju jia na ka por sha ka por ïa ki paradoh ki parasnam ha ki jaidbynriew Karbi bad ki bor pulit jong ka Assam, ka dei ba ka Sorkar Meghalaya ka pynlong jaka kura (Punching Bag) ïa ki paidbah ba lui-lui tang na ka daw ba ka Sorkar Jylla ka dang ïakren da ki phew tylli ki snem ïa kata ka kam ïa pynbeit pud bad ka jylla Assam? Ka FKJGP ka buh ka jingkylli ïa utei u Myntri sa katno tylli ki mynsiem ba kordor kum ka jaidbynriew kan dang ïai duh bad sa katno kum ka jaidbynriew kan dang ïai shah thombor jemrngiew ha ki jaidbynriew Karbi?
Ka seng ka la dep shong ïa ka jingïalang kaba kyrkieh ban ïathir sani bha halor katei ka bynta jong ka jinglong jingman ha ka shnong Lapangap bad ruh jong kiwei pat ki jaka khappud kiba don hapdeng ki jingïakajia. Kumta ka seng ka la bthah ïa la ki dkhot ba kin long kiba la khreh la ka long ha kano-kano ka por ban mih madan, kampher long katba long jia katba jia ‘lada kita ki bor jong ka Sorkar kim lah ban ai jingïada ïa ki paradoh parasnam, ki dkhot jong ka seng ki long kiba kloi ban shimti bad ha kata ka por ka Sorkar kam dei satia ban kynnoh ba ki samla ki shim ïa ka aiñ ha la ka jong ka kti’.
Kyntang ïawai ka FKJGP ka phah ïa ka kyrwoh sha ka Sorkar Jylla ba kam dei satia ban shim sting ïa kane ka jingjia da kaba shu ‘Thied por ha ka kyrteng jong kata ka jingïa pynbeit pud’ hynrei ka dei ban pyni da ki kam khnang ba ki paidbah nongshong shnong kiba shong sha ki jaka khappud kin ïoh ïa ka jingshong shngaiñ. Ha kawei pat ka liang ka FKJGP ka kyntu jur ruh ïa baroh ki seng saiñpyrthei ba kin ïeng tylli kawei ban ai ka jingïada bad ka jingshngaiñ ïa ki trai ri trai muluk kiba shong ba sah ha ki jaka khappud da kaba klet noh shipor ïa ka jingkwah burom, jingsngew pher saiñ hima bad kumta ter ter, hynrei ban saiñdur ïa ka jylla hi baroh kawei nangne shakhmat.
