Khliehriat, Naitung 02
Ka lympung ïalehkai 3rd Division League Stage ba la pynïaid da ka East Jaiñtia Hills District Football Association (EJHDFA) ka la nangjam shaphrang ha ka Sngi Balang ha kaba ka Rymbai Pohskur ka la pynjem khnap ïa ka Umtyra SC haduh 7-0 kol.
Ha kane ka jingïakhun kaba la long ha madan Artificial Turf Diengshynrum kaba ha Khliehriat, ka Rymbai Pohskur ka la pynkhih jar lyngba u Veryfy Bareh ha ka minit kaba 12. U rangïalehkau ka liang pyrshah, u Kyrmen Bareh u la ïarap pynthep haduh ar kol ha ka minit kaba 14 & 43. Hadien katto-katne por ka Rymbai ka la pynbud biang ïa ka kol lyngba u Emon Nongtdu ha ka minit kaba 17 & 80+1, katba ïa kiwei pat la thep da u Chester Nongtdu (49) bad u Lamphrang Dkhar (37).
Ka Moonongtdu SC ka la jop da 2-1 kol ïa ka Iangkaluh SCSC. Ïa kine kol la thep da u Miki Lyngdoh ha ka minit kaba 23 bad u Poibiang Lamurong (26), katba ïa ka kol jong ka Iongkaluh la thep tang mar ïasdang da u Jermi Dkhar (7).
Haba phai sha kawei pat ka jingïalehkai kaba la long kham shwa hapdeng ka Umrasiang UTD SC bad ka Youth SC Pyrtakuna ka la ïasam mar shi point hadien ba ki la ïakhaid mar 1-1 kol. Ïa ka kol na ka bynta ka Youth SC Pyrtakuna la thep da u Empliios Pala ha ka minit kaba 25 bad ïa ka Umrasiang la thep da u Ten Muksor (80+3).
Ha ka Sngi Palei ka jingïalehkai kan long hapdeng ka Moopala SC pyrshah ïa ka Moosniang Rim SC ha ka por 11 baje mynstep, ka Narwan SCSC ïa ka Pamrapaithlu SCSC ha ka por 1 baje mynsngi bad ka Pala SC ïa ka Nongsning Youth SC ha ka por 3 baje nohphai sngi.
