Shillong, Naitung 02
Ka Kong Angela Rngad, Adviser ka Meghalaya and Greater Shillong Progressive Hawkers and Street Vendors Association (MGSPHSVA) ka la ther tyngeh ïa u Bah Paul Lyngdoh halor ka jingong jong u ba ka don eiei sha lyndet haba ïadei bad ka jingmih ki kynrum-kynram ban pynslem ïa ka jingpynkynriah ïa kiba shong die madan ha Khyndai Lad.
Haba kren sha ki lad pathai khubor ha ka nohphai sngi jong ka Sngi Balang, ka 2 tarik u Naitung 2025, ka Kong Angela ka la ong, u Myntri un hap ban pynshai halor ka jingkren jong u lem kumta kan ujor da ka ejahar bad kumjuh ruh da ka mukotduma pynjah burom (defamation case) pyrshah ïa u.
Nalor kata, ka la ong ruh ba kat ka kyrdan u Myntri u dang kren laplah bad lehse ka lah ban don eiei pynban sha lyndet ka jingkren jong u.
Ka la ther tyngeh ruh da kaba ong ba u Bah Paul u la shu kren laplah ban pynïalam bakla ïa ki paidbah nalor ba um dei u dkhot ka Provisional Town Vending Committee (PTVC) bad um dei hi ruh u Myntri ba dei peit ïa ka Urban Affairs.
“Nga kwah ban pynshai sha ki paidbah ba ha shwa ba i Bah Paul in rem ha kane ka ilekshon bad iba la bat teng ruh kum u Myntri ka Urban Affairs ka Sorkar Jylla, da kaba buh jingkylli ba phi la leh aïu ha kato ka por ba phi bat kum u Myntri ka Urban Affair halor ban pynbeit ïa ki jingeh baroh? Bad ka jubab ka long ba um pat leh eiei. Bad haba ki nongdie madan ki la lum baroh bad ki shlur ban leit sha ka ïingkashari ban dawa ba ka Jylla jong ngi ka dei ban wanlam ïa kane ka aiñ bad mynta ka la pyntreikam thik-pa-thik ïa kane ka aiñ ki nongdie madan, hynrei phi wan ban pynthame bad wan pynthohbria ïa ka seng nongdie madan; ka bha ba phin pyrkhat arsien,” ka la ong.
“Lada u Bah Paul u dei shisha uba don ka jingkitkhlieh na ka bynta kane ka sor Shillong naduh u snem 2016 haduh mynta ruh u la dei ban ai jingmut ban kren eiei hynrei um shym la kren eiei bad mynta pat u la wan kren thamula bad ka long pynban ka jinglehraiñ,”.
Haba ïadei pat bad ka jingwan kyndang ki briew ka tnad Municipal ïa ki dukan ha Khyndai Lad, ka seng ki nongdie madan ka la dep ïa shong ban pyrkhat kam halor katei ka jingjia.
Ka Kong Angela ka la ong ba ha ka jingïapyrkhat kam ki nongshong die madan baroh ki la rai ban ïeng skhem beit ha kajuh ka nongrim ban ym kynriah na Khyndai Lad kat bym pat treikam hok ïa ka aiñ ban phah kynriah.
Ka la bynrap da kaba ong ba ka jingpynkhihwin ïa ka aiñ kan ap jingma bad kam don jingmut eiei ruh em bad ngin ym shah ïano-ïano ruh ban wan pynthamme.
“Ka jingai por ka sorkar ba shwa ka 22 tarik mynta u bnai Naitung baroh kiba shongdie madan ha Khyndai Kad kin kynriah noh sha MUDA, ïa kane ruh khlem pat ïa rai. Kane baroh ka dei tang ka jingkwah leh donbor bad ong ba lada ka sorkar kan ïa trei ryngkat-ryngkat bad kan ym don jingeh bad kan ym jia ïa kulmar kumne,” la ong ka Kong Angela.
