Shillong, Naitung 02
Ka Golflink SC ka la bteng ïa ka jingjop kaba saw ha ka lympung ïalehkai 4th Division Under-20 Football League 2025 ba la pynïaid da ka Shillong Sports Association, hadien ba ka la pynliem noh ïa ka Risa Colony SC da 2-1 kol ha ka Sngi Balang.
Ha kane ka jingïakhun kaba ka long ha SSA Stadium kaba First Ground Polo, baroh ar kynhun ki la pyrshang ban ïakhun tyngeh naduh kaba sdang. Hadien shiteng kynta ka Risa Colony ka la ïoh ban pynkhih jar nyngkong eh lyngba u Teilas Marweiñ ha ka minit kaba 34.
Wat lada ka Golflink ka la shah thep shi kol, hynrei dei ha ka kylla miet ba ka la lah ban pynphai kylla ar kol lyngba u Debian Suting ha ka minit kaba 59 bad kawei pat na u Andoni Suting (80).
Lyngba kane ka nam jop ka Golflink ka dang ïai bteng ban bat ïa ka kyrdan ba ha khlieh ha ka Group-A ryngkat 12 point na ki saw sien ïakhun, katba ka Risa Colony ka dang sah ha ka kyrdan shatrai ryngkat 2 point na ki saw sien ïakhun.
Ka jingïalehkai ha ka Sngi Palei kan long hapdeng ka Nongthymmai R Nongkynrih SC pyrshah ïa ka Dilingiem SC ha ka por 4 baje janmiet.
