Shillong, Naitung 02
Ka Meghalaya Youth Federation (MYF) Mairang Zone ha ka 2 tarik u Naitung, 2025, hapoh ka jingïalam jong u Bah Randar Mawlong kum President lem bad ki dkhot ka seng ki la leit ban jurip ïa ka jaka ba pyntrei ïa ka skhim Jal Jeevan Mission (JJM) kaba don ha ka shnong Umthied Bynther bad ka PHE Mawsawa.
Ha katei ka jingleit jurip, ka seng ka la lap ba ki don tang ki bar jylla kiba trei ha katei ka jaka bad haba kylli ïa ka jingdon kine ki bar jylla ïa ka Labour License, Work Permit bad ka Police Verification la lap ba ki don tang ka Labour License bad khlem ka Work Permit ne ka Police Verification.
Ha ka jingïakren bad ki lad pathai khubor hadien ka jingjurip, ki nongïalam ka seng ki la pynpaw ba kine ki bar jylla ki la trei mynta la kumba 2 snem eiei hynrei kim don ïa ka Work Permit, ka Police Verification bad kumjuh ka Labour License jong ki ruh kaba ki don ka la kut. Kumta na ka liang ka seng ka la kyntu ïa ka tnat Pulit ba ka dei ban peit pyrman bad dawa ba kitei ki nongtrei ki dei ban pynbiang ïa ka Police Verification.
“Ngi dap da ka jingsngewkhia namar lada ngi peit hangne ngim ïohi ban don ki Khasi ki ban trei hynrei katkum ka rukom, ka dei ban don ka jingai kam lang ïa ki Khasi ba kin ïatrei bad hangne ngi ïohi ba ki don tang ki bar jylla suda kiba trei. Ngi dawa ïa kane ka kompani kaba pyntrei ba ka dei ban pynrung kam lem ïa ki khynnah Khasi jong ngi ba kin ïoh ban trei lang ha kane ka kompani”, ong ki nongïalam ka Seng. Ka seng ka la ai por ruh ïa ka kompani kaba pyntrei ïa kane ka skhim ba ki dei ban pynbiang ïa kine ki jingduna lym kumta ka seng kan sa wan mih biang ban jurip bad lada lap ba kim pat pynbiang ïa ki kot-ki sla ba donkam, ka seng kan sa beh hi ïa kine ki bar jylla.
Da kaba ban jur ruh ba kum ka tnat Pulit ka dei ban khmih bha ïa ka jingwan trei wan ktah ki bar jylla shapoh ka Ri Khasi namar dang shen ruh la sakhi shibun tylli ki jingjia ba la leh da ki bar jylla bad da kaba pynbiang ïa ki Police Verification kan wanrah ruh ïa ka jingshong shngaiñ ka Ri Khasi bad ka jaidbynriew hi baroh kawei.
Shuh-shuh, halor kane ka bynta, na ka liang ka seng ka la leit ruh ban ujor sha ka Deputy Commissioner ka Eastern West Khasi Hills District, ka Kong Anita Kharpor ha kaba ïadei bad ka jingbym don kine ki bar jylla ïa ka Work Permit bad ka Police Verification bad kumjuh ban ujor ïa ka jingpynslem ban pyntreikam ïa kane ka skhim.
“Mynta la 2 snem naduh u 2023 ki la pyntrei bad haduh mynta ka dang dep tang 60% ka jingtrei. Ngi la buh ka jingdawa bad ka jingujor ha ka DC ba kan shimkhia lem ban kyntu ïa ki kontraktor bad kiba dei peit ba kin pynsted ban pyntrei ïa ka kam,” bynrap ki nongïalam ka seng.
