Shillong, Naitung 02
Ha ka step jong ka 02 taik u Naitung 2025 kawei ka trok kaba don ïa u Registration Number ML 05 AC 6346 ka la kylla hapdeng surok bah ha Hyn -ñiew Mer, Upper Shillong, ka jaka kaba don mar syndah bad ka ktem shipai. Katei ka trok ka la kylla hapdeng surok kaba dei ka surok kaba dang pyntrei bad pynheh.
La sakhi ruh ba ka surok ha shilynter ka Hynñiew-Mer ka la dap satang ka ktieh bad shong um bad kaba la pynsyrtok ïa ki paidbah nongleit nongwan lyngba katei ka surok, namar ba ka dang sdang ban pyntrei ïa ka surok.
Ka jingkylla jong katei ka trok ka la pynsahkut lut ïa ki kali ba hiar sha nongbah Shillong ha ka step Sngi Balang haduh shiteng sngi.
Lah ban kdew ba kane ka jingdheng kali kam dei eh tang na ka daw ba la khyllem katei ka trok hapdeng surok, hynrei ka jingdheng kali ka la ïaid mynta la bun-bun sngi naduh ba la sdang ban shna pynheh ïa katei ka surok kaba sdang na Rilbong ter ter shaduh surok Upper Shillong.
