Shillong, Naitung 02
Ha ka khana jingjop kaba khraw haba phai sha ka jingsumar budlum, ka Department of Orthopaedics & Trauma jong ka NEIGRIHMS ka la seisoh ha ki ar tylli ki jingsumar ‘endoscopic lumbar spine discectomy’ da kaba pyndonkam ïa ka buit ‘Destandau’.
Kane ka jingjop ka pynlong ruh ïa ka NEIGRIHMS kum ka Hospital Sorkar banyngkong eh ha ka Thaiñ Shatei Lam Mihngi ban ïaid shakhmat bad kane ka rukom sumar katkum ka juk stad ba mynta.
Kane ka jingsumar ka thmu ban pynduna ïa ka jingshon ka jingpang ha ki thied budlum kaba mih namar ka ‘herniated or prolapsed disc’ ha u budlum, kaba lah ban ïalam sha ka jingpang, jingbym sngewthuh eiei (numbness), ne jingtlot ha ka met bad ki kjat.
Haba ïadei bad kane, ar ngut ki nongpang kiba la san ka rta, na Tripura bad Mizoram, baroh ar ngut kiba la ïoh ïa ka ‘symptomatic lumbar disc prolapse’ kaba jur bad kaba ïalam sha ka ‘sciatica’ – ha kaba ym lah ban leh eiei, ka jingpang jur namar ka jingwit ne syngit jong u thied ‘sciatic’ uba sdang na ka bynta sha trai jong ka met sha ki kjat, ki la ïoh ïa ka jingmyntoi jong kane ka buit sumar.
Ïa ka ‘case’ banyngkong la sumar da u Dr. Sachlang Debbarma, Associate Professor ba la synran da ki doktor – Tashi Khonglah bad Chirag Sharma. Katba ïa ka ‘case’ ba-ar la sumar da u Prof. (Dr.) Bhaskar Borgohain, Head of Orthopaedics, ba la synran da u Dr. Naveen A.S.
Baroh ar ngut ki nongpang ki la nang ïoh bor hapoh ka jingsumar ba kyrpang ki nongsumar bad ‘Physiotherapy’ bad la khmih lynti ba shen kin sa leit phai biang sha ki kam ba man ka sngi jong ki. Na ka liang u Director ka NEIGRIHMS, u Prof. (Dr.) Nalin Mehta u la ai jingïaroh ïa ka kynhun kaba la kynjoh ïa une u mawmer ha ka jingsumar bad ka jingkut jingmut ba nang kiew haba ïadei bad ki rukom sumar thymmai, ka jingnang-jingstad bad ka jingtbit ha ka liang ka tnad sumar ‘Orthopaedic’.
Shuh shuh u Prof. Mehta u la bynrap ba kane ka jingjop ka pyni ïa ka jingsdang jong ka juk bathymmai ha ka jingsumar ‘minimally invasive spine surgery’ ha NEIGRIHMS.
Ka jingdon ba man ka por jong ka jingsumar ‘minimally invasive endoscopic spine surgery’ ha ryngkat ka sienjam ‘keyhole approach’ kan pynduna ïa ka jinglut-jingsep ha ka jingsumar bad ka por ba sah ha Hospital namar ka jinglah ban koit kloi hadien ba la ïoh ïa ka jingsumar.
