Shillong, Naitung 02
U Symbud Myntri Rangbah ka Jylla, Bah Prestone Tynsong u la ong ba ka jingkhang ka dang plie ïa ka seng kieng atiar ka Jylla ka Hynñiewtrep National Liberation Council (HNLC) ba kan wan shakhmat ban ïakren ïasuk bad ka Sorkar.
Haba kren sha ki lad pathai khubor, u Bah Prestone u la ong ba u ngeit skhem ba ki dkhot ka HNLC hadien habud kin sa sngewthuh ba ka lynti kaba ki ïaid mynta kam ïalam shano-shano ruh bad kam don ka lawei.
Halor ka jingwan pyndem wait jong ar ngut ki dkhot ka HNLC ha ki sngi kiba dang shu dep, u Symbud Myntri Rangbah u la ong ba u don ka jingkyrmen ba kiwei ki dkhot jong ka seng ruh kin sngewthuh ba ka kam jong ki kan ym poi shaei-shaei ruh bad ba ka rai jong ki ban wanphai biang ka dei namar ka jingkwah ban ïoh ïa ka lawei kaba don jingmut.
“Nga thikna ba kiwei pat ki dkhot ruh kin sa sngewthuh ha kawei ka sngi ba ka kam jong ki kam poi shano- shano ruh. Kumjuh kum ki ar ngut kiba dang shu dep pyndem, balei ki leh kumta? Namar ki sngewthuh ba ki donkam ïa ka lawei, ka kam. Ki dang samla, lehse hapoh 30 snem ka rta, bad ki la ïohi ba ka jingwanphai biang sha ka lynti kaba dei ka long kaba kongsan,” ong u Bah Prestone.
U la kyntu ruh ïa ki dkhot kiba dang don bad ka seng ba kin bud ïa ka nuksa jong kito kiba la aiti noh bad ïasoh ha ka lynti kaba dei.
“Nga kyrpad ïa baroh ki dkhot jong ka HNLC ban bud ïa ki dienjat jong ki bad ban ïasoh ha ka lynti kaba dei,” u la bynrap.
Haba kylli, hato ki nongïalam ka HNLC ki pynlong ïa ka Bangladesh kum ka ktem jong ki, u Bah Prestone u la ong ba um lah ban ong eiei halor kata hynrei na ka liang ki pulit pat ki long kiba husiar bha halor kane.
U la pynpaw biang ba ka Sorkar Meghalaya ka dang plie ka lad ban ïakren bad ka HNLC, da kaba ban jur ba ka shong ha ka seng lada ka kwah ban ïakren.
“Nga la ong ïa kane bunsien ba ka jingkhang jong ka Sorkar ka dang plie ban ïakren. Lada ka HNLC ka kwah ban sdang ïa ka jingïakren, ngi long kiba la pynkhreh. Ka jingkhang ka plie na ka liang jong ngi. La ka long ka jingkhangïit ne ka jingkhang, ka shong ha ki ban plie. Lada ki kwah ban ïakynduh ïa ngi, ngi long kiba la pynkhreh beit bad ka phone jong ngi ruh ka meh beit,” bynrap u Myntri.
