Mawkyrwat, Naitung 02
Ka lympung ïalehkai 1st Division Football League jong u snem 2024-25 ba la pynïaid da ka Ranikor Civil Sub Division Sports Association (RCSDSA) ka la poi sha kaba kut ha ka Sngi Ba-ar ha kaba ka Balat Sports Club ka la long ka lahduh.
Kane ka nam jop ka la wan urlong hadien ba ka la lah ban pynliem noh ïa ka Mawpyllun SC da 2-0 kol ha madan Nolikata, Ranikor Block kaba ha South West Khasi Hills District.
Ïa kane ka lympung la wan ban pynhap pyrda da u Bah Hamletson Doh-ling, President ka Megha-laya Football Association (MFA) ryngkat ka jingdonlang u Bah Kitborlang Nongrem, Myntri Shnong Rangthong kiwei ki ‘riew rangbah, ki dkhot ka RCSDSA bad ki paidbah jong kane ka dong ka thaiñ.
U Bah Hamletson haba ai jingkren ha katei ka sngi, u la ai khublei ïa katei ka synjuk kaba la kynmaw ban khot ïa u ha ka por plie bad kumjuh ha ka sngi pynkut. U la ïathuh ruh hadien ba ka na ka liang ka Ranikor Sub Division Sports Associa-tion ki la wan ban ïakynduh bad kyrpad ïa ka MFA ban ai jingithuh noh bad hadien ka jingpeit bniah, kane ka synjuk ka la don hok ban ïoh ïa ka jingithuh namar ka la lah ban bud ryntih ïa ki mat bad ki kyndon ba ka MFA ka la buh.
U la ong ruh ba na ka liang ka MFA kan sa ïa shong jingïalang ha ka 12 tarik mynta u bnai bad u la kyrmen skhem ba kane ka synjuk kan sa ïoh noh ïa ka jingithuh na ka MFA. Nangta u la ïathuh ruh ba kin don shibun ki jingmyntoi ïa ki samla lada la ïoh jingithuh na ka MFA namar naduh mynta u snem ki samla kane ka dong thaiñ ki la lah ban ïashim bynta ha ka Youth League ba pynlong da ka MFA bad kumjuh ka lahduh jong kane ka lympung kan sa ïoh ban ïashim bynta ha ka Meghalaya State League (MSL).
Namar kata, u khot bad wer ïa ki samla kane ka dong ka thaiñ ba ki dei ban long kiba trei shitom bad kiba don ïa ka discipline bad u la ïathuh ruh ba na ka liang ka MFA ka la pyrshang ban wad ïa ki rangïalehkai na ki Sub- division, ki Block bad ki Distrik bapher bapher na ka bynta ban pynkhreh ha ka jingïashim bynta ha ka National Games ka ban sa long ha u snem 2027 bad ki samla ki dei ban shim ïa ka kabu ksiar namar ka long ha kane ka Jylla bad u khmih lynti ha ka phutbol ki dei ban wan shakhmat bad ïoh rah ïa ka nam ka jingjop, la bynrap u Bah Dohling.
