Mairang, Naitung 02
Uwei u rangbah u la duh noh ïa la ka jingim hadien ba la suba ba la phasi ha kawei na ki jaka kaba long khlaw harud surok ha ka shnong Mairangbah ka ban leit sha Laitdom ha Eastern West Khasi Hills.
Katkum ka tyllong khubor, katei ka jingjia ka la jia ha ka 2 tarik u Naitung 2025. La ong ba ha ka por kumba 10 baje eiei mynstep ki pulit jong ka thanat Mairang ki la ïoh ïa ka jingujor ba la lap ïa kawei ka metïap jong uwei u briew kaba la sdien phasi ha u tyllai ha katei ka jaka.
Shuh shuh ka khubor na ki pulit ka ong ruh ba ïa utei u briew la tip kyrteng kum u Henry Basaiawmoit, 42 snem ka rta bad u dei uba shong ba sah ha ka shnong Langstiehrim Pyndengumïong uba la jah rngai na la ïing ha ka 29 tarik u Jylliew 2025.
Ka khubor na ki bahaïing jong utei u rangbah, la ong ba kin shym la buh kano-kano ka jingujor ejahar ha ka por ba u jah na la ïing namar ki dang mut ba u dang leitkai sha ïing ki paralok.
Ka tyllong khubor ka ong ruh ba ha ka step jong ka sngi Balang ka 2 tarik mynta u bnai hadien ba la ïoh jingtip ïa kane na ka liang ki pulit ki la leit mar-mar sha katei ka jaka bad rah noh ïa ka metïap sha Civil Hospital Mairang ban leh ïa ka post mortem bad ki pulit ki la pynrung mukotduma bad ka jingtohkit ka dang ïaid shakhmat.
