Jowai, Naitung 02
Ka long ka khubor kaba sngewkhia namar ka jingkam lamler jong uwei briew ka la jan mih biang ka huri-hura hapdeng ar kynhun ki jaidbynriew kata ki Pnar bad ki Karbi ha West Jaiñtia Hills District.
Kane ka khubor ka dei halor ka jingkam jong u Lilut Joit na ka shnong Lapangap ba u la mynsaw na ka jingshah siat jri ha ki Karbi kiba shong bad sah ha Langkaroi kaba don marjan bad ka shnong Khanduli bad ka shnong Lapangap ha ka 1 tarik Naitung.
Hynrei ka jingshisha ka long mar khongpong namar katkum ka jingïathuh jong katto-katne ngut ki briew kiba ïohi ïa kane ka jingjia, ki la ïathuh ïa u Waheh Shnong ka Lapangap u Ma Deimonmi Lyngdoh ba u Joit u la mynsaw na ka jingur jong u na ka bicycle hajan ka shnong Langkaroi ym ba u la shah siat da ka jri ha ki Karbi. Ka Dorbar Shnong Lapangap lyngba u Waheh shnong ka la maham ban leh da kaba tyngeh pyrshah ïa kino- kino ki nongshong shnong kiba shim kabu khamtam ha kum kane ka por ba don ka jingïakynad hapdeng ki ar jaidbynriew.
