Nongstoiñ, Naitung 02
Ka Deputy Commissioner (DC) ka Eastern West Khasi Hills District ka la pyntip paidbah ba ka Sorkar India lyngba ka Ministry of Environment, Forest and Climate Change kan pyntreikam ïa ka aiñ katkum ka Plastic Waste Management (Amendment) Rule, 2022 ban mana ïa kino-kino ki ‘riewshimet ne ki karkhana shna ne pynmih plastic lane ban buh lypa (stock) ïa ki plastic ba lah ban pyndonkam tang shisien (single use plastic) lane ki pla plastic kiba ka jingrben ka duna ïa ka 120 micron.
Ha ka kyrwoh khubor, na ka liang ka DC ka la ong ruh ba kine ki plastic ki kynthup naduh ki pliang plastic, ki pela plastic ki jingsop bad kiwei-kiwei ki jait plastic kiba ka jingrben jong ki, ka duna ïa ka 120 micron.
Shuh shuh ka la pynpaw ruh ba yn ym shah shuh ïa kino-kino ki nongkhaïi kiba ju die pynïaid ïew bad pynpoi ïa ki plastic sha ki dukan, ne ki nongshong dukan kiba ju pyndonkam ha ka ban song ïa ki mar die lane ki ‘riew paidbah ban pyndonkam da ki plastic ha kaba song bad rah jingrah, namar ka jingpyndonkam ïa kine ki jait plastic kiba duna ka jingrben na ka 120 micron ka pynjot ïa ka mariang, ka pynjaboh ïa ka imlang sahlang bad ka buh jingma ïa ka koit ka khiah jong ki nongshong shnong.
Na ka liang ka Deputy Commissioner ka la bthah sha baroh ki nongshong dukan kiba don ha Eastern West Khasi Hills District ba ki dei ban pynphai noh ïa ki plastic ba dangsah ha ki dukan jong ki sha ki trai nongdie kiba ju pynpoi ïa ki plastic lane ban aiti noh ïa ki plastic ba dang sah sha ka ophis ka Deputy Commissioner hashwa ka 30 tarik Naitung, 2025. Ka kyrwoh khubor ka ong ruh ba lada lap ïa kino-kino kiba ïaleh pyrshah ïa kane, kin shah pynshitom bad shah daiñ kuna katkum ka aiñ ba la buh da ka sorkar.
Nangta, ka la la kyntu ruh ïa baroh ban pyndonkam da kiwei pat ki jait pla kum ki pla jaiñ, pla kot, ki sla bad kiwei ki bym pynjulor ïa ka mariang bad kiba lah ban pyndonkam bunsien.
