Shillong, Naitung 02
Ka All India Football Federation (AIFF) bad u coach ka kynhun ïalehkai ka ri u Manolo Marquez ki la rai ban ïakhlad noh lyngba ka jingïamynjur lang hadien ba um shym la lah ban kyntiew ïa ka India ha ki jingïalehkai ba la lah.
Utei u coach uba na Spain, uba la mad mynshwa ïa ka jingjop ha ka Indian Super League da kaba rah ïa ka nam lahduh ha u snem 2022 ïa ka Hyderabad FC bad ka Super Cup ha u snem 2024 ïa ka FC Goa, u la shah thung kum u coach ka India ha u Jylliew 2024. Hynrei ki jingmih kim shym la ïaid kumba la kyrmen ha ka por ba u long u coach. Te kumta ka Executive Committee jong ka AIFF ka la mynjur ban pyllait noh ïa u Manolo Marquez, 56 snem ka rta, na ka kam kaba u bat, hadien ba u la pynpaw ba u kwah ban hiar shuki noh, watla u dangsah sa shi snem ha ka jingïateh soskular.
Ka India ka la ïalehkai ha ki phra tylli ki jingïalehkai hapoh ka jingïalam u Marquez bad ka la lah ban jop tang shisien, kaba long ka jingjop ïa ka Maldives da 3-0 kol ha ka jingïalehkai paralok kaba la long ha nongbah Shillong. Ka jingshah rem kaba khatduh jong ka, ka long ha ka 10 tarik u Jylliew, ha kaba ka India ka la mad ïa ka jingshah rem ha ka Hong Kong da 0-1 kol ha ka wat kaba lai jong ka jingïakhun AFC Asian Cup 2027. Wat hapdeng ka jingjop, u Marquez u la ban jur ba ka India ka dang don ka lad ban ïoh rung. “Ngi sngewsih. Ka kamra khreh ka long kum ka jingleit ontep. Hynrei ngi dangdon ha ka jingïakhun,” u la ong hadien ka jingshah rem.
Ki jingdiaw mynsiem ka la nangjur. Hadien ka jingïakhaid khlem lah ban thep kol pyrshah ïa ka Bangladesh ha u Lber, u Marquez u la kynthoh pathar ïa ka jingïalehkai. “Nga bitar shibun, nga sngewsih ïa baroh,” u la bynrap da kaba ong. “Lehse kane ka dei ka jingshisha jong ka phutbol ha India.”
Ka dur jong ka India ka la nanghiar ha u snem ba la dep. Kane ka kynhun kam shym la lah ban jop wat tang kawei ka jingïalehkai ha ka AFC Asian Cup 2024 ha Qatar, ha kaba ka la shah pynhap noh ha ka kyrdan ïakhun jong ka jingïalehkai group. Naduh u Naiwieng, ka India kam shym la jop satia ïa ki jingïalehkai ba ka la ïakhun bad ka la hiar na ka kyrdan kaba 99 sha ka kyrdan kaba 127 ha ka thup kyrdan jong ka pyrthei ha ka FIFA.
U Marquez u la shah thung kum coach ha u Jylliew 2024 na ka bynta ar snem bad u la bujli ha ka jaka u Igor Stimac kum coach ba ha shwa.
