Shillong, Naitung 02
U Symbud Myntri Rangbah ka Jylla, Bah Sniawbhalang Dhar uba khmih ruh ïa ka tnat Pynroi Sor, u la pynpaw ba ka sorkar ka khlem kyndang satia ïa ki nongdie madan hynrei ka la ai ha ki ïa kawei pat ka jaka shong dukan, kum ha MUDA Complex, kaba biang eh ban pynïaid ïa ka kam khaïi-pateng.
Haba kren bad ki lad pathai khubor ha ka Sngi Balang, u Bah Sniawbha -lang u la ong, “Ka Sorkar kan leh la ka jong ka kam. Ngi la pynlong tang ïa ka jingkhynra ban buh ïa ki briew jong ngi ha ka jaka kaba dei. Kane ka long ruh katkum ka hukum ka ïingbishar”.
Katkum ka jingpynpaw u Symbud Myntri Rangbah, ka jinghiar khynra ka dei kaba la leh katkum ka hukum jong ka ïingbishar bad ka jingthmu ka long ban buh ïa ki nongdie madan ha ki jaka ba la ithuh. Ka jingthmu jong ka jingpynkynriah ïa kiba shong die madan ka dei eh ban pynmyntoi ïa ki bad ban wanrah ïa ka khuid ka suba ka nongbah Shillong.
U Bah Sniawbhalang u la ong, “Nalor kata, baroh na ngi, ngi kwah ïa ka sor jong ngi kaba khuid ba suba. Hooid, ngi hap ban burom ruh ïa ki nongïaid nongïeng bad ki briew ba pyndonkam lang ïa ki surok bad lynti ïaid.”
Shuh shuh na ka liang u Bah Sniawbhalang u la ïathuh ba ka Sorkar kala ïakynduh ïa ki briew ba shong die madan bad kala sngap ïa ki jingkyrpad jong ki ban bishar kynthup ka jingkwah jong ki ïa ka jaka ka ban lah pynïaid ïew ïa ki mar ki mata. “Kum ka Sorkar, ngi la pyrshang ban leh ha kata ka rukom ba ngin ym shu bret ïa ki briew jong ngi. Ngi la ai ha ki ïa ka jaka kaba biang eh ha MUDA Complex, kaba biang eh ban khaïi. Kila kyrpad ïa ngi ban buh ïa ki ha ka jaka ka bym dei eh ka jaka pynlong ïew.Ngi la pdiang ïa kata bad ngi la leh ïa kaei kaba kila kyrpad,” u la ong.
Haba pynpaw ïa ka jingsngew skhem ba ki nongdie madan kin ïatreilang bad ka Sorkar bad ba kin kynriah noh sha ki jaka bala buh hapoh ka 22 tarik u Naitung, u Bah Sniawbhalang u la ong ba lada kim leh ïa kata, ka aiñ kan shim ïa la ka jong ka lynti da kaba ïeng skhem ha ka nongrim ba ka Sorkar ka kut jingmut ban bud ïa ka hukum jong ka ïingbishar.
