Jowai, Naitung 02
Ki dkhot ka Jaiñtia Students’ Union (JSU) ha ka Sngi Balang ki la pynlong da ka jingïakhih hakhmat ka shlem treikam u Deputy Commissioner (DC) ka West Jaiñtia Hills District, ban dawa na ka Sorkar ba mardor ka dei ban phah kham bun ki bor pulit sha ka shnong Lapangap.
U General Secretary ka JSU, Neikee Mukhim, u la ong ba ki la pynlong ïa kane ka jingïakhih ban pynthikna na ka bynta ka jingshngaiñ jong ki paid nongshong shnong ka Lapangap kiba ju ngat khah-khah ha ki jingshah pyndik ha ki jaidbynriew Karbi ka Assam.
U la ong ba ka seng ka la leit ruh ban ïakynduh ïa u Symbud Myntri Rangbah ka Jylla uba khmih ïa ka tnat Home (Police) u Bah Prestone Tynsong kumjuh ïa ka Director General of Police (DGP) ha ka 26 tarik Jylliew ba la dep da kaba kyntu ban phah kham bun ki bor pulit na ka bynta ban pynneh ïa ka shongsuk bad na ka bynta ka jingshngaiñ jong ki nongshong shnong ka Lapangap.
Ha kane ka jingïakhih, ka JSU ka la aiti ruh ïa ka dorkhas kaba ai por khatduh sha u Deputy Commissioner da kaba kyntu ban phah noh mardor ïa ki bor pulit Special Force (SF)-10 sha ka shnong Lapangap.
“Ha kane ka jingïakynduh na ka liang u DC u la kular ïa ki nongïalam ka JSU ba un thoh sha ka Sorkar na ka bynta ban phah shuh-shuh ïa ki bor pulit sha katei ka jaka bad ban pynthikna ïa ka shongsuk shongshngaiñ jong ki nongshong shnong, khamtam ha kaba kum kane ka por kaba dei ka aïom ban thung ban tep namar kiba bun ki nongrep kim nud shuh ban leit sha ki jaka rep namar ka jingtieng,” ong u samla Mukhim.
Na ka liang u DC u la kyntu ruh ïa ka JSU ba kan ïa don bynta ha ka Peace Committee na ka bynta ban pynbeit ïa ki jingeh bad ban pynthikna ïa ka shongsuk shongsaiñ ha katei ka thaiñ.
