Kyiv, Naitung:
Ka US ka dang pynsangeh ïa ki katto katne ki jingshalan tiar sha Ukraine hapdeng ka jingsngewkhia ba ki jingbuh tiar jong ka, ka la hiar palat, la ong ki heh sorkar ka US ha ka Sngi Ba-ar, kaba long ruh shi bynta jong ka jingpyrshang jong ka America ban tehlakam noh ia ka jingpynlut phut ia ka ioh- ka kot jong ka ri bad ha kajuh ruh ka por hapdeng ka jingpyrshang jong ka ban ïada ia ka Ukraine na ki jingshah thombor kiba nang jur jong ka Russia.
Namar la ong ba ka US, ka la dep kular ban phah ia katto- katne ki tiar ïakhun thma sha ka Ukraine hapoh ka jingsynshar jong u Biden, ban iarap pynkhlaiñ ia ka jingiada naka bynta ka Ukraine hadpeng ka jingiakhun thma jongka bad ka Russia ha kane ka thma kaba la neh palat lai snem mynta. Kumta, la ong ba kane jingsangeh noh jong ka US ia katei ka jingthmu, ka pyni ia ka jingpynbeit thymmai jong ki mat ba kongsan hapoh ka jingsynshar ba thymmai jong u President ka US ba mynta- u Donald Trump bad kaba la wan ruh hadien ba ki heh jong ka tnat iada ri ki la bishar bniah ia ki jingbuh jingkynmaw ba mynta jong ka US bad ki la pynpaw ia ki jingsngewkhia halor ka jingpynsepei ia ki mang tyngka jong ka ri.
“Ïa kane ka rai la shim ban buh hakhmat eh ïa ki jingmyntoi jong ka America hadien ka jingbishar bniah ïa ka jingkyrshan bad jingïarap shipai jong ka jaitbynriew jong ngi sha kiwei pat ki ri ha kylleng ka pyrthei,” ong ka nongaiktien jong ka White House, ka Anna Kelly ha ka kyrwoh.
Watla katta, ka la pynpaw ba ka bor bad jingskhem jong ka tnat shipai ka US kam shym la kylla ne duh bor.
Kane ka long ka jingpynshai jongka, ia ka jingkren jong u Trump, ha kaba u Trump u la ong ba ka US kan iai ther da ki ‘namding sha ki shlem Nuclear ka Iran lada ka Iran ka ialeh pyrshah ia ka US.
