Shillong, Naitung 02
U Symbud Myntri Rangbah ka Jylla bad uba dei ruh u Myntri ba khmih ïa ka tnat Kam Pohïing, Bah Prestone Tynsong, u la ong ba ka jingïakajia khappud ka long kaba suk kaba saiñ, da kaba pyrshang ruh ban pynbha ïa ka jinglong-jingman ha Lapangap.
Haba kren sha ki lad pathai khubor ha ka Sngi Balang, u Myntri u la ïathuh ba la buh ïa ka ktem pulit ba shipor ha Lapangap ha kaba ki don kumba 30 ngut eiei ki pulit kiba trei baroh 24 kynta ban pynneh-pynsah ïa ka suk ka saiñ.
U Myntri u la bynrap ruh ba ka Assam ka la buh ïa kajuh ka jingdon ki briew sha ka liang jong ki ha khappud.
U la pynpaw ka jingsngew skhem ba ka jinglong- jingman ka nang kham bha bad ba u Myntri Rangbah ka Jylla, u Conrad K Sangma un rah ïa kane ka mat ban ïakren bad u Myntri Rangbah ka Assam ban pynbeit shuh-shuh ïa kino-kino ki kam kiba dang sahteng.
“Hooid, u Myntri Rangbah un shimkhia bad u Myntri Rangbah ka Assam. Ym tang katta, ka jingïakren lyngba ka phone ka la don hapdeng ar ngut halor katei ka mat,” ong u Bah Prestone.
Haba kylli shaphang ki jingthmu ban buh ïa ka ktem pulit ba neh, u Bah Prestone u la ong ba ïa ka jinglah ban pynkylla ïa ka ktem ba shipor sha ka ktem ba neh yn sa bishar bniah ynda ka jinglong-jingman ka la jem bad ka la long kaba biang bad ong ba mynta, katei ka ktem ba shipor ka long ban weng ïa ki jingeh kiba kyrkieh ha ka jingshngaiñ ha katei ka thaiñ.
