Khliehriat, Naitung 02
Ki bor pulit ka East Jaiñtia Hills ha ka Sngi Balang ki la ïoh ban kem noh ïa uwei u suba nongkhaïi drok na Umtyra, East Jaiñtia Hills bad ïoh ban kurup bun bah u drok Heroin.
Na ka liang u heh pulit u la pyntip ba ka kynhun pulit ha kane ka sngi ka la pynlong ïa ka jingtalasi kali ha Umtyra, EJH hadien ba ki la ïoh ban bat noh ïa kawei ka kali kaba don ïa u number ML04-B-9703, ba la ñiah da uwei u briew uba kyrteng u Kabir Uddin Mazumder ha ka por 11 baje mynstep.
Hadien ba la pynlong ïa ka jingtalasi ïa ka kali, ki la ïoh ban kurup noh ïa 14 tylli ki song sabon ba la thep ïa u drok heroin uba don ka jingkhia haduh 160.36 gram.
Ha kaba ïadei bad kane ka jingïoh kurup, la kem noh ïa une u briew hapoh ki kyndon ka Narcotic Drugs and Psychotropic Substances (NDPS) Act bad ka jingtohkit mynta ka la ïaid shakhmat khnang ban ïoh kem sa ïa kiwei pat kiba donkti.
