Shillong, Naitung 02
Ka Kong Biolin Pyrtuh, President jong ka Meghalaya and Greater Shillong Progressive Hawkers and Street Vendors Association (MGSPHSVA) ka la ther tyngeh ïa u Bah Paul Lyngdoh, Nongaiktien ka Sorkar MDA-2 bad Myntri ka tnat Jngohkai Pyrthei ka Sorkar Jylla da kaba ong ngin nym treh ïa ka pisa ba ïarap ka sorkar T.10,000 bad ka T.2,000 ïa man uwei-pa-uwei nongdie madan.
Halor ka jingong jong u Bah Paul ba baroh kiba shongdie madan ki la ïamynjur lang ban kynriah sha MUDA, hynrei ka Kong Biolon ka la ong, ba ngi khlem don kata ka jingïamynjur lang halor kane, da kaba ong ba ngim pat don kawei ka sngi ruh ban shong jinglang bad u Bah Paul bad ngim shym don kata ka jingïamynjur lang ban kynriah sha MUDA.
Ka Kong Biolin ka la pynpaw ïa kane haba ïakren bad ki lad pathai khubor ha ka Sngi Balang, ka 02 tarik u Naitung 2025 ha Khyndai Lad, kaba dei ka sngi balai jong ka jingwan kyndang ki briew na ka tnat Municipal Board ïa kiba shongdie madan ki bym don ïa ka Certificate Of Vending (COV). Haba kylli pat, kaei ka daw ba la pynlong ïa kiba shongdie madan ba kim treh ïa ka pisa ba ïarap ka Sorkar, ka Kong Biolin ka la ïathuh ba ngim treh ïa kata ka pisa ba ai ka sorkar namar ba ngim kwah ïa ka hok jongno-jongno bad ngi kamai da ka umsyep lajong.
Nalor kata ruh ka la ong ba ngin leh aïu ïa kata ka T.10,000 bad ka T.2,000, hynrei Bah Paul sngewbha ba phin pynlang ïa kata ka pisa ban ïakhun biang ïa ka ilekshon.
Nalor nangta, ka la ong ba kane ka jngkren u Bah Paul ka long tang ban pyni sha ki paidbah ba ki briew kin kynnoh ba dei kiba shongdie madan kiba saitlah ïa ka sorkar. Hynrei u Bah Paul u khlem khot ïa kiba shongdie madan shisien ruh ban ïakren bad ka jingkren jong u Bah Paul ka long ka bym don nongrim eiei ruh em.
“Kita ki 200 ngut kiba leit kynduh ïa u Bah Paul ruh ngim don jingtip bad ïoh lehse ki leit ïakynduh hi ruh ïa kata ka seng kam don jingtip namar shisien ruh ngim pat leit ïakynduh ïa u Bah Paul, da kaba pynrem jur ïa ka jingkren jong u,” ong ka Kong Biolin.
Shuh shuh ka la ong ngim donkam ïa kata ka T.10,000 bad kata ka T.2000, hynrei u Bah Paul un sngewbha ban pynlang ïa kata ka pisa ban pynkhreh ïa ka ilekshon namar ngim sngewtynnad ba un wan ban korbar ïa ka kam jong ngi, da kaba ai pisa bad ngim ju treh hi ruh. Haba ïadei bad ka jingong u Bah Paul ba ka jingdon kiba shong die madan ka la pynwit ïa ka jingwan jngohkai ki briew nabar, ka Kong Biolin ka ong ba kane ka la bakla jur, da kaba kam ba lada ym don kiba shongdie madan ym don uwei ruh u nongwan jngohkai u ban wan ïaid na Khyndai Lad.
