Shillong, Naitung 02
Ka kynhun ki ‘thei ïalehkai Under-17 ka Lotus Secondary School na East Jaiñtia Hills bad ka Tyrsad HSS na East Khasi Hills ki la lah ban pynpaw ïa ka jingtbit ha ka lympung ïalehkai State Level Subroto Mukherjee Football Cup Tournament 2025 ba la pynïaid da ka tnat ïalehkai jong ka Sorkar Jylla ha ka Sngi Balang.
Ha kane ka jingïalehkai kaba la long ha Madan Heh Mini Stadium kaba ha Mawlai Phudmuri, ka Lotus ka la pynjem khnap ïa ka St. Claret HSS (South West Garo Hills) haduh 8-0 kol. Ka Thehlut Sana (3 & 37) bad ka Alisha Lyngdoh (11 & 36) ki la thep mar ar kol, katba ïa ki shi kol pat la thep da ka Risaka Phawa (16), Twinkie Shylla (26), Biangmon Sutnga (58) bad ka Hosana Lapasam (60).
Kumjuh, ka Tyrsad ka la pynjem khnap ïa ka Kakurol HSS (South Garo Hills) haduh 11-0 kol. Ka Ha-i-sha Myrthong (2, 36, 40, 43 & 52) bad ka Ribanta Nongbri (3, 7, 8, 9 & 21) ki la ïoh hat-trick da kaba thep mar san kol lem bad ka Wanrihun Kharnaïor (13, 17, 41 & 47) ka la thep saw kol. Katba ïa ki shi kol pat la thep da ka Balabet Khongsit (4), Lishaphulda Khongsit (29), Jenisha Rani (35) bad ka Badaïahunlang Jyrwa (51).
Ka Nongjri Presbyterian SS (Ri-Bhoi) bad ka Kyrshai Govt. L.P&U.P. School (West Khasi Hills) ki la ïakhaid mar 1-1 kol.
Ka Nongjri ka la pynkhih jar nyngkong eh lyngba ka Daphi Syngkli ha ka minit kaba 43, hynrei ka Rosemary Sahshang ka la lah ban pynïakhaid na ka bynta ka Kyrshai ha ka minit 52.
Ka Upper Kharkutta U.P School (North Garo Hills) bad ka Govt. Boys HSS (West Garo Hills) ki la ïasam mar shi point hadien ba kim shym la lah ban thep kol haduh kaba kut ka jingïalehkai.
Ha ka jingïalehkai jong ka Under-15 Boys, ka Little Star Eng. Med. SS (Eastern West Khasi Hills), Musniang SS (East Jaiñtia Hills) bad ka Govt. Boys HSS (West Jaiñtia Hills) ki la ïoh jingjop.
Ka Little Star ka la pynliem noh ïa ka Govt. Boys HSS (West Garo Hills) haduh 4-0 kol. U Kishan Wahlang (15 & 43) u la thep ar kol, katba ïa ki shi kol la thep da u Pynroilang Lyngdoh Kynshi (11) bad u Habankhlur Lyngdoh Mawnai (21).
Ka Musniang ka la jop da 7-0 kol ïa ka St. Claret HSS (South West Garo Hills). U Everlasting Dkhar u la ïoh hat-trick da kaba ïoh thep kol ha ka minit kaba 6, 7, 32 & 49. Katba ïa kiwei pat la thep da u Shibunki Dkhar (2), Rishanki Siangshai (15) bad u Thrang Da Emi Dkhar (28).
Ka Govt. Boys HSS (West Jaiñtia Hills) ka la wanphai da ka jingjop ïa ka Mandalpang Govt. L.P School (North Garo Hills) lyngba ki ar kol ba la thep da u Deiwa-E- Metre Shylla ha ka minit kaba 3 & 42.
Ka Little Star ka la bteng biang da ka jingjop ïa ka St. Mary’s HSS (East Garo Hills) da 3-0 kol. U Banjoplang Thongnirit u la thep ar kol ha ka minit kaba 11 & 45 bad ïa kawei pat la thep da u Balajied Lyngdoh (16).
Haba phai sha ka Under-17 ki shynrang, ka Karukol HSS (South Garo Hills), Nongjri Presbyterian SS (Ri-Bhoi) bad ka O.M. Roy Memorial HSS (East Khasi Hills) ki la ïoh jingjop.
Ka Karukol ka la pynliem noh ïa ka St. Claret HSS (South West Garo Hills) da 2-1 kol. Kane ka la wan urlong lyngba u Bambu P. Marak uba la thep ha ka minit kaba 38 & 50, katba u Arlundsky D. Sangma (49) u la lah ban pynphai shi kol ïa ka St. Claret ha shwa ba kan mad ïa ka jingshah rem.
Ka Rongrenggre Govt. HSS (East Garo Hills) ka la shah rem noh ha ka Nongjri Presbyterian SS (Ri-Bhoi) haduh 7-0 kol. Ïa kine la thep da u Michael Basaïawmoit (6), Chanjib Chetry (9), Wanphyrnai Skhemlon (13 & 15), Banteilang Malieh (19) bad u Eric Steven Nongbri (67 & 70+3).
Ka OM Roy ka la pynliem noh ïa ka Little Star Eng. Med. SS (Eastern West Khasi Hills) lyngba ka shi kol ba la thep da u Lamshai Jana ha ka minit kaba 42.
Ha kawei pat ka jingïalehkai hapdeng ka Borshing Memorial SS (West Khasi Hills) bad ka Bajengdoba HSS (North Garo Hills) ki la ïakhaid mar da 2-2 kol. Na ka Borshing la thep da u Rishanbor Kharsanglein (38 & 42), katba u Nikseng R. Marak (12 & 60) u la lah ban pyniakhaid na ka bynta ka Bajengdoba.
