Couer d’alene, Naitung:
Hadien ba ki pulit ki la wad bniah ia ka jingim jong u suba don kti ha ka jingleit thombor ia ki briew ka tnat pynlipding dang shen, la shem ba ka jingim bad jinglong-jingman jong u ha kine ki bnai ba la dep, kam long kaba bit-biang ha shwa ba ki bor pyniaid kin ioh bat noh ia utei u khynnah- samla 20 snem haba iadei bad katei ka jingjia.
La ong ba u Wess Roley u shu im jakpoh na ka kali jong u bad u sah lang ryngkat bad u paralok barim, u T.J. U Franks Jr.,uba la khap noh ia u shñiuh ba jrong. Kitei ar ngut, ki la iasah iing wai lang la kumba hynriew bnai eiei ha Sandpoint, Idaho, tad haduh ba u Roley, u la kynriah noh ha u bnai Kyllalyngkot.
U Roley, uba ki bor synshar ki ong ba u la shim ia la ka jingim hadien ki jingshah siat ha ka Sngi U Blei, la suba ba u la pyniap ia ar ngut ki dkhot jong ka tnat pynlip ding ha Idaho.
U Roley, u la thang ding da kaba pyndonkam da u mawsiang ha u lum Canfield, uba dei ka jaka lehkai kaba pawnam bha, ong ka khubor jong ki bor pyniaid. Ki nongpynlip ding kiba la leit mar mar sha katei ka jaka ki la lap ba ki la shah thang bad ki la rieh tngen ha lyndet jong ki kali pynlip ding.
Ar tylli ki helicopter ki la ïalum lang ha katei ka jaka, kiba don ki sniper kiba la pynkhreh ban sei ïa utei u briew lada donkam, katba ka FBI ka la pyndonkam ïa ki jingtip jong ka mobile phone jong u ban bud-dien ïa u bad ha kaba khatduh, la lap ia ka met jong u Roley ha utei u lum ha ryngkat ka suloi kaba don hajan jong u bad kumta ki pulit ki la suba ba u la pynkut hi da lade ia la ka jingim.
Ki kynhun tohkit bad ki nongwad bniah, ki la shem ruh ba u Roley u la angnud naduh mynshwa ban long u nongpynlip ding.
