Shillong, Naitung 02
Ka ‘thei ïalehkai karate ka Jylla ka Kynjailin Lyngdoh Mawlai ka la shah jied ban mihkhmat ïa ka ri India sha ka lympung ïalehkai 9th South Asian Karate Championship 2025 ka ban long ha Colombo, Sri Lanka naduh 4 haduh 6 tarik mynta u bnai.
Kane ka jingïoh lad ka Kynjailin ka long lyngba ka jinglah ban ïalehkai bha ha ka 4th Senior and U-21 National Karate Championship 2025 ba la pynïaid dangshen da ka Karate India Organisation (KIO) ha Gachibowli Indoor Stadium kaba ha Hyderabad.
Kumta kane ka ‘thei ïalehkai kaba long tang marwei na ka jylla Meghalaya ban leit shim bynta sha katei ka lympung, ha kaba kan ïakhun ha ka kyrdan ïalehkai U-21 Individual Kumite 50kg jong ki kynthei,
Na ka liang ka All Meghalaya Karate-Do Association lyngba ka kyrwoh ba la pyllait da u General Secretary Bah Ksan Kupar Warjri, ka la pynpaw ka jingsngewsarong halor kane ka jingshah jied ka samla Kynjailin ban mihkhmat ïa ka ri India sha katei ka lympung ka ban long ha Sri Lanka.
Kane ka jingshah jied kam dei tang ba ka la lah ban pynpaw ïa ka mynsiem ïakhun bad ka sap ba ka don, hynrei ka ïarap ban rah ïa ka burom jong ka Jylla hi baroh kawei.
Namar katta, na ka liang u President, General Secretary, ki coach bad ki dkhot ka AMKA ki la ai khublei kitbok ryngkat ki jingkyrkhu kyrdoh ba kan lah ban jam shaphang ha kane ka jingïaid lynti ha ka kam ïalehkai jong ka bad ba kan lah ban pynpaw ïa ka sap ba kyrpang ha kane ka lympung ïalehkai shabar ri.
