Shillong, Naitung 03
Ki nongkyrshan ka United Democratic Party (UDP) na Mowkaiaw Konstitwensi bad Amlarem Konstitwensi ki kwah ba ka UDP kaba ïatreilang ha ka Sorkar MDA-2 ka dei ban bujli Myntri ïa u Bah Kyrmen Shylla, MLA ka Khliehriat khnang ban ïoh bynta lang kiwei ki MLA kiba la jop arsien na West Jaiñtia Hills District.
Haba ïoh ban ïakren bad katto-katne ngut ki nongkyrshan ka UDP na Mowkaiaw bad Amlarem Konstitwensi ki bym kwah pynpaw kyrteng kaba hap ha West Jaiñtia Hills District, ki la pynpaw ba kum ki nongkyrshan ki kwah ba ka UDP Sengkmie ka dei ban bujli Myntri na ka bhah ka UDP na Jaiñtia Hills ha ka Sorkar MDA-2.
Ki la pynpaw ba ha Jaiñtia Hills, ka UDP ka la jied ïa u Bah Kyrmen Shylla kum Myntri ha ka Sorkar MDA-2 hynrei haduh mynta ka UDP ka khlem pat ïakren eiei la kan bujli ne em haba ka ar snem shiteng ka la kut.
Kumta kum ki nongkyrshan ki kwah ba ka UDP ka dei ban bujli noh ban ai uwei na ki ar ngut ki MLA na West Jaiñtia Hills District kata lada dei ïa u Bah Lahkmen Rymbui, MLA ka Amlarem ne ïa u Bah Nujorki Sungoh, MLA na Mowkaiaw Konstitwensi.
Ki la pynpaw ba kiwei ki seng saiñpyrthei kiba don ha ka Sorkar MDA-2 ki lah ban bujli Myntri mar ar snem shiteng, ka UDP ruh ka dei ban bujli Myntri ha Jaiñtia Hills ruh khnang ban ïoh bynta lang ki MLA kiba jop mar arsien.
Shuh shuh ki la pynpaw ba u Bah Kyrmen Shylla uba dei MLA ka Khliehriat, East Jaiñtia Hills District uba bat kum Myntri ha ka Sorkar MDA u la jop arsien, kumjuh u Bah Nujorki Sungoh na Mowkaiaw bad Bah Lahkmen Rymbui na Amlarem kiba dei na West Jaiñtia Hills District ki dei kiba jop mar arsien na ka UDP.
Na ka liang ki nongkyrshan ki la pynsngew ïa kane ka jingkwah ban bujli Myntri ha ki nongkitkam ka UDP West Jaiñtia Hills District.
Kum ban shu pynkynmaw, ka UDP ka ïoh tang ar ngut ban bat Myntri ha ka Sorkar MDA-2 kata u Bah Paul Lyngdoh bad u Bah Kyrmen Shylla. Hynrei u Bah Paul Lyngdoh uba dei MLA mynta na West Shillong Konstitwensi bad jop bunsien u lah ban bteng bad ban bat ïa ka kam Myntri haduh ban da kut ka samoi treikam namar bun ki MLA na Khasi Hills ki dei kiba dang jop tang arsien.
Ki khubor kiba ïoh lum ki ïathuh shuh shuh ba ka UDP Sengkmie kan sa ïakren ban bujli Myntri ha Jaiñtia Hills sa tang lada ki nongïalam ka UDP na West Jaiñtia Hills ki pynpaw ban bujli Myntri namar baroh lai ngut MLA ki dei kiba la jop mar arsien.
Kum ban shu pynkynmaw, ki khubor kiba la mih ha kine ki sngi ba u Myntri Rangbah ka Jylla u Conrad K Sangma un sa bujli Myntri ha ka Sorkar MDA-2 mynta u Naitung 2025 haba ka ar snem shiteng ka la kut.
Hynrei ki khubor ki ïathuh ba ka jingbujli Myntri kan long ha u Nailur 2025 kaba long thik ka jingdap ar snem shiteng ka jingsynshar ka Sorkar MDA-2, khnang ba ki Myntri kiba thymmai kin ïoh shong ha ka shuki mar ar snem shiteng.
Ka jingbujli u Myntri Rangbah ïa ki Myntri ka dei namar ka HSPDP, BJP ki dei ki seng kiba don ar ngut ki la dep ïakut ban ïa bat mar ar snem shiteng hynrei la sngewthuh ba wat ka NPP ruh kin sa bujli lang ïa ki ar ngut ki Myntri ban pynrung da kiwei pat ki MLA.
