Jowai, Naitung 03
Ka jingbteng ban ai Work Order sha katto-katne ki MDC kiba la shah rem noh ka la pynbitar shikatdei eh ïa ki MDC jong ka Voice of the Peoples Party (VPP) bad Congress haduh ba ki la leit buh syndon da ka dorkhas ha u Deputy CEM jong ka Jaiñtia Hills Autonomous Dis-trict Council (JHADC) u Ma Lasky Rymbai ha ka 3 tarik Naitung.
Kine ki MDC ki la pynpaw ka jingpyrshah halor ka rukom treikam jong ka JHADC kaba aiti work order sha ki MDC kiba la shah rem noh ban pyntrei ïa ki skhim ka konsil, da kaba ong ruh ba kane ka pynhiar dor ïa ka bor treikam jong u MDC uba la jied da u paidbah ha u snem 2024 bad ruh ka hok synshar paidbah.
Katkum ka dorkhas ba la aiti ha u Ma Lasky Rymbai uba dei ruh u EM ba peit ïa ka tnat Civil Work, ki la ong ki la ïoh jingtip ba ka JHADC ka la pynmih bun tylli ki work order sha ka Development Committee kaba dei jong u MDC barim ne Ex MDC.
Shuh shuh ka dorkhas ka la ong ba katkum ka Para 2 (7) jong ka Sixth Schedule, u MDC un treikam katkum ka por kaba la buh da ka aiñ, lait noh lada shah weng ne shah pynbeit hapoh ki kyndon ba la buh bad um lah shuh ban shim bynta ha ka synshar ne ka Development bad ka Committee kaba ïadei bad u ruh ka kut noh ka bor treikam.
Halor kane, kine ki MDC ki la buh jingkylli da kaba ong ka kyndon bad hukum aiu kaba la pynkup bor ïa ka Development Committee jong u MDC barim ban shim ban bad pyntrei ïa ki skhim bad la don mo ka jingpynbna paidbah kaba ai bor shuh shuh ïa ka committee jong u MDC barim hadien ba um long shuh u MDC jong kata ka constituency bad ha kajuh ka por ki la dawa ruh na ka EC ba kan ai jingpynshai lyngba ka jingthoh halor kane ka kam.
U MDC ka Shilliangmyntang Ma Daeimi Liam, u la ther tyngeh ïa ka tnad Civil Work bad kynnoh ruh ba la aiti ïa ki work order sha ki MDC barim dang ha kine ki bnai ba la dep kata ruh khlem da pyntip sha ki MDC kiba thymmai.
Shuh shuh u Ma liam u la ong haba buddien halor kane na u EM ki la ïoh pynban ka jubab ba lah ban treikam lang da ka jingiasngewthuh jingmut hapdeng u MDC barim bad u MDC bathymmai, da kaba u pynpaw ruh ka jingsngew phylla ba ka aiñ aiu kaba la aplai hapoh JHADC.
Ka Kong Devipaia Tongper ka la pynpaw ka jinglyngngoh ba don kiwei ki constituency ki ailad ba u MDC thymmai un pyntreikam ïa kita ki skhim bad ong ba kane kadei tang ka jingleh shilliang bad jingibeiñ ïa ki MDC bathymmai.
“Lada uta u MDC uba shah rem u dang lah ban pyntreikam ïa ki skhim pynroi hapoh ka constituency, te ka myntoi aiu ïa ngi ki MDC bathymmai ban jop,” la ong ka Kong Devi da kaba kyntait ruh ban pdiang ïa ki jingbatai jong u EM lane ka tnat ka jong u.
Katba, u Ma Rikut Parien u la ong ngi khlem pyrshah ïa ka skhim, hynrei kaei kaba ngi pyrshah ka long kumno ka Committee barim ka dang im bad lah ban pyntrei ïa ki skhim nalor ba u MDC barim u la kut noh ka por treikam jong u. Shuh shuh u la ong haba pan jingshai na u EM la ïoh jubab ba kane ka dei ka skhim jong ka sorkar kmie bad katkum ka jingpynshai jong u (EM) ba la dep issue ïa ka Preliminary Work Order ha shwa ka Election.
U Ma Jamshaphrang Pohtam u la ong ïa ki skhim hapoh ki constituency bapher bapher la ki dei jong council ne Sorkar Kmie dei ban pyntreikam da u MDC bathymmai ne MDC ba mynta.
