Shillong, Naitung 03
Ka Ïingbishar ka Jylla Meghalaya ka la shong bishar ha ka 3 tarik u Naitung, 2025, halor ka muktoduma kaba ïadei hapdeng ki nongdie madan bad ka Sorkar Jylla bad ha kane ka jingshong bishar da u Chief Justice, u I.P. Mukerji bad u Justice W. Diengdoh ki la pynmih ïa ka hukum ba la thung ïa u Senior Advocate, u Subhasis Chakrawarty kum u Special Officer ha kaba ka Sorkar ka hap ban siew T.75 hajar hapoh ka 11 tarik u bnai Naitung, 2025.
U Special Officer ha ryngkat bad ki nongïalam ka Hawker’s Association, ki bor ba dei peit bad ki Pulit kin hap ban pynkhreh ïa ka thup kyrteng jong ki nongdie madan kiba don kumba 349 ngut eiei.
Ka hukum jong ka Ïingbishar ka la ong ruh ba u Special Officer, u/ka General Secretary jong ka Association, ki bor ba dei peit bad ki Pulit kin hap ban peit ba kito ki nongdie madan kiba khlem don ïa ka laisen pat kim dei ban phriang ïa ki mar-ki mata jong ki ha Khyndailad katba kito kiba don ïa ka laisen pat kin ïoh jaka ban die ha ka jaka kaba ki ju shong baroh shikatta hynrei da ka por kata naduh 12:30 mynsngi haduh ka por 2 baje nohphai sngi bad naduh 7:30 mynmiet haduh ka por 9 baje mynmiet bad kata ruh lada u/ka General Secretary jong ka Association ki bahkhlieh ba kin bud beit thik ïa kane ka por bad kin ym pynwit ïa ka ïaid-ka ïeng jong ki kali ne ki paidbah.
Nalor kata, katei ka hukum ka la ong ruh ba lada ki pynkheiñ ïa ka hukum, ki bor ba dei khmih bad ki pulit kim dei ban shah ba kin shong die jingdie ha kitei ki jaka ba ki shong mynta.
“U Ophisar ba kyrpang ryngkat bad u/ne ka General Secretary jong ka kynhun, ki bor ba dei peit bad ki bor pulit kin peit ba kine ki nongdie madan ki bym don laisen kim dei ban die ïa kino-kino ki jait mar ha katei ka jaka ba la kdew haneng. Lada don ka jingpynkheiñ, te u Ophisar ba kyrpang ryngkat bad ki bor ba dei peit bad ki bor pulit kin ym shah ïa kino-kino nongdie marbam ha katei ka jaka,” ong ka rai jong ka ïingbishar.
“U/ka General Secretary jong ka kynhun ruh u shimkhia ha kane ka ïingbishar bad un pynthikna ba katba lah ban pynbiang ïa ka jaka die jingdie, un hap ban kynriah mardor. Lada um leh kumta un shah beh noh na ka jaka die jingdie mardor,” ong shuh-shuh ka rai ka ïingbishar.
Ka ïingbishar ka la bthah ruh ba ki nongdie jingdie kin hap leit sha ki ki jaka die ba la pynbiang da ka bor ba dei peit, bad kiwei pat ki nongdie jingdie ki bym pat don ïa ki laisen, kin hap ban pan laisen kiba biang.
“Kiwei pat ki nongdie jingdie kin long kiba laitluid ban ai aplikeshon hakhmat ki bor ba dei peit ban ïoh ïa ka laisen kaba biang kaba lah ban bishar bniah da kita ki bor katkum ka aiñ. Hadien ba la ïoh ïa ka kaiphod na kita ki bor ha kaba ïadei bad kita ki aplikeshon kane ka ïingbishar kan pyrkhat ban shimkhia shuh shuh ha kaba ïadei bad ki,” ong ka rai jong ka ïingbishar.
U Ophisar ba kyrpang un pynthikna ban pyntreikam suk ïa ki hukum jong ka ïingbishar bad un aiti ïa ka kaiphod hapoh ka 5 tarik u Nailar, 2025.
