Shillong, Naitung 03
Ki bahaïing bahasem jong ka Kong Ledina Sohlang ki la pynpaw ïa ka jingsngewkmen haduh katta-katta hadien ba ki la ïoh jingtip ba ka Ledina Sohlang ka la kha ïa ki khun synrap shynrang haduh 3 ngut.
Ka Kong Ledina Sohlang, 27 snem ka rta, ka dei na ka shnong Mawreng-Mihngi kaba hap hapoh ka East Khasi Hills District bad u kurim jong ka pat u dei ba la tip kyrteng kum u Banteilang Nongsiej.
Na ka liang u nongthoh khubor jong U Nongsaiñ Hima ha ka Sngi Palei ka 03 Tarik u Naitung 2025, u la leit ban ïakynduh kyrpang bad katei ka longkmie jong lai ngut ki khun synrap ha Mawreng-Mihngi ha ka jingïadonlang ki bahaïing bahasem.
Haba ïakren bad ka Kong Ledina, ka la ïathuh ba ka dap da ka jingsngewkmen kaba khraw haduh katta-katta kum ka ïing hi baroh kawei hadien ba ka la ïoh jingtip na ki doktor ba ka pun ïa ki khun synrap haduh 3 ngut.
Ka la ïathuh ba ka la kha ïa kine ki khun synrap 3 ngut myn ha ka 09 tarik u bnai Jylliew 2025 ha Woodland Hospital, Shillong.
“Kane ka dei ka sien kaba nyngkong eh hapoh ka shnong, ka thaiñ bad ha ka ïing ka sem jong ngi bad ïa ka kur Sohlang hi baroh kawei ban ïoh haduh 3 ngut ki khun synrap,” la ong ka Kong Ledina.
Nangta ka la ainguh ruh ïa U Blei uba najrong ba lyngba ka jingkyrkhu jong u ba ka sa ïoh ïa kine ki khun synrap 3 ngut.
Ka la ïathuh ruh ba hadien ba la ïoh ïa ki khun synrap 3 ngut ki bahaïing bahasem ki la dap da ka jingsngewkmen bad naduh ba ka dang don ha hospital ruh ki la wan ban peit bad jngoh ïa ki khun.
Kumta ka Kong Ledina ka la kyrpad ïa ka sorkar ba lada ka don kano-kano ka lad ban phai khmat lem sha ka ïing ka sem jong ngi bad ban ïarap, namar ha kum kane ka por haduh 3 ngut ki khun ban pyndap pynbiang ka la long kaba la shem jingeh namar ba ki wan ha ka longïing kaba duna ha ka ïoh ka kot. Kumjuh, ka la kyrpad ïa u MLA ka Mawphlang Konstitwensi ba un sngewbha ban kner lang ka jingïarap bad phaikhmat na ka bynta ka ïing ka sem jong ngi.
Na ka liang ka hynmen jong ka Kong Ledina Sohlang, Kong Everseen Sohlang, ka la pynpaw ïa ka jingsngewkmen halor kane bad ainguh ïa U Blei ba kine kiei-kiei baroh ki long ka jingpynïaid bastad jong u.
Shuh shuh ka la pynpaw ruh ka jingsngewkmen, namar hapoh shnong jong ki ym pat ju don kiba kha khun synrap haduh 3 ngut bad kane ka dei ka sien kaba nyngkong eh ha ka shnong bad ha ka ïing ka sem ruh kumjuh.
