Khliehriat, Naitung 03
Ka Musniang Rim, Narwan SCSC bad Nongsning Youth SC ki la ïoh jingjop ha ka lympung ïalehkai Third Division League Stage ba la pynïaid da ka East Jaiñtia Hills District Football Association (EJHDFA) ha madan Artificial Turf Diengshynrum, Khliehriat ha ka Sngi Palei.
Ha ka jingïalehkai kaba nyngkong, ka Musniang Rim ka la pynliem noh ïa ka Moopala SC da 1-0 bad ïa kane kol la thep da u Medakerlang Siangshai ha ka minit 80+1.
Ha ka jingïalehkai kaba bud, ka Narwan SCSC ka la pynrem da 2-1 kol ïa ka Pamrapaithlu SC. Ïa ki kol jong ka Narwan la thep da u Blik Phadong (18) bad u Lamphrang Langstang (34). Katba ïa ka shi kol jong ka Parapaithlu la thep da u Shal Shylla (72).
Ha kawei pat ka jingïalehkai ka Nongsning Youth SC ka la jop da 3-0 kol ïa ka Pala SC. U Kmenlang Siangshai u la thep ar kol ha ka minit kaba 2 & 30, bad kawei pat na u Spain Dkhar (80+3).
