Shillong, Naitung 03
Da ka jingthmu ban pynskhem ïa ka ri India kum ka ri kaba khlaiñ bor ha ka jingïalehkai ha ka pyrthei kaba lah ban pynlong ïa ki lympung bah kynthup ïa ka Olympic ha u snem 2036, bad ban pynbeit ïa ki jingeh ha ki synjuk ïalehkai, ka sorkar pdeng ha ka Sngi Ba-ar ka la mynjur ïa ka ‘National Sports Policy (NSP) 2025’ na ka bynta ban kyntiew ïa ka roi ka par, ka bha ka miat jong baroh ki nongshong shnong.
Ha ka jingïalang jong ka Kynhun Myntri ba la pynïaid da u Myntri Rangbahduh ka ri, Narendra Modi, la mynjur ïa kane ka polisi bathymmai ryngkat ar tylli ki mat kata “ka jingpynshong nongrim kaba jylliew ïa ki jingïalehkai bad ban ïoh ïa ka jingtbit ha ki jingïalehkai hapoh ka ri bad ha ki lympung shabar ri ruh kumjuh na ka bynta ban saiñ dur khnang ban kyntiew shaduh ka Olympic”.
Haba pynbna ïa ka rai jong ka Kynhun Myntri, u Myntri ka tnad Information And Broadcasting ka Sorkar Pdeng, u Ashwini Vaishnaw u la pyntip, “Ka polisi thymmai ka bujli ïa ka polisi ïalehkai jong ka ri kaba rim mynta la arphew snem kata naduh u 2001 bad ka buh ïa ka jingthmu ban pynlong ïa ka India kum ka kynhun kaba khlaiñ ha ka pyrthei, kynthup ïa ka Olympic 2036.”
U Vaishnaw u la bynrap, “Yn kyntiew ïa ka jingkoit jingkhiah ha ka rukom im lyngba ki rukom buh kyrdan ïa ki skul bad ki jaka trei, katba ïa ki prokram ban wanrah ïa ka jingkoit jingkhiah ha ka imlang- sahlang kum ki jingïalehkai shi ïing ha kaba kut jong ka taïew bad ki jingïalehkai yoga yn pynlong ïa ka jingïashim bynta da baroh ki paidbah.”
Ka NSP ka shim khia ïa ki jingïalehkai dangshen jong ka ri ha ki lympung kiba heh kynthup ïa ka Olympics, Paralympics, Asian bad Commonwealth Games bad ban ithuh ïa ka jingdonkam ban tei halor kine ki jingjop bad ban thaw ïa ka rukom treikam kaba neh na ka bynta ka jingjop kaba slem ha ki jingïalehkai, ong ka kyrwoh sorkar.
Ka ‘Khelo Bharat Niti’ 2025, ka polisi “ka kyntiew ïa ka jingseng ïa ki lympung ïalehkai bad ki jingïakop bapher-bapher, bad ban pynroi ïa ki lad jingïalehkai ha sor bad nongkyndong, ban tei ïa ki jaka ïalehkai ba kynsai; ki jingai jinghikai ba paka, ki kor teknoloji ban kyntiew ïa ka jingïalehkai bad kiwei kiwei.”
