Shillong, Naitung 03
U khlur ïalehkai phutbol ka Liverpool bad Portugal, Diogo Jota, u la duh noh ïa la ka jingim ha ka Sngi Palei namar ka jingkem ding kaba shyrkhei ka kali kaba u ñiah hajan Zamora kaba ha Spain.
Kane ka jingjia ka la shim ruh ïa ka jingim jong u para jong u, u Andre uba shong lang da kajuh ka kali bad u.
Katkum ka khubor na ki bor pynïaid jong ka Spain bad kiba la sakhi ïa katei ka jingjia, la ong ba kitei ar ngut, ki don ha kawei ka kali Lamborghini, ha kaba ka la ïaid lyngba ka surok bah A-52, ka la kem ding bad ka la pynlong ïa ka jingïap jong kitei ar ngut. Kane ka jingjia kaba sngewsih ka la pynkyndit ïa ka pyrthei baroh kawei bad khamtam ïa ki nongkyrshan jong u, kaba la jia tang hadien 10 sngi ka jingpyndep ïa ka jingkyntiew kurim jong u Jota. Ki nongkyrshan bad ki paralok kumjuh ki sngewsih ïa ka jingduh noh une u rangïalehkai uba ka jingim jong u ka dang don jingkyrmen ba un nang kiew shaphrang ha ka kam ïalehkai.
Ka kali kaba la ngat ha katei ka jingjia ka dei ka Lamborghini, ka kali sports car kaba rem dor bad la tip ruh na ka bynta ka jingstet bad ka bor treikam jong ka. Ki khubor ki ïathuh ba katei ka kali ka la kem ding ha ka por ba ka pyrshang ban ïaid lait ha ka surok bah, ha kaba ym shym la lah ban teh lakam. Nangta katei ka kali ka la kem ding, bad ki thylliej ding ki la pur sha ki jingthung jingtep kiba don hajan, kaba la buh jingeh shi kat dei ban ïoh pyllait im ïa kitei ar ngut shipara kiba don shapoh jong ka kali.
Ki bor nongïarap ki la poi mardor, hynrei kim shym la lah ban pyllait im ïa u Jota kumjuh ïa la u para. Ka jingjied ïa kum kane ka kali kaba rem dor bha ka pyni ïa ka rukom im jong kiba bun ki nongïalehkai ba paw, hynrei kaba sngewsih ka long ba ka buh ha ki jingma kiba lah ban mih na kaba ñiah ïa kum kine ki kali ha ka jingstet kaba khlaiñ shi kat dei.
Katei ka jingjia, ka dei ha ka surok A-52, kaba don hajan ka nongbah Zamora, kaba don ha ka thaiñ shatei lam mihngi jong ka Spain. Ki nongïarap jong katei ka thaiñ, kynthup ïa ki pulit pynïaid kali bad ki pulit pynlip ding jong ka Zamora, ki la pynthikna ïa ka jingshyrkhei jong kane ka jingjia. La ïathuh ba katei ka kali, ka la bthei hadien ba ka la ïaid sharud surok, kaba la pynlong ïa ki nongpyllait im ban shem jingeh na ka bynta ban ai jingïarap mardor. Baroh ar ngut, u Diogo Jota, 28 snem ka rta lem bad u para jong u, 26 snem ka rta, la pynbna ba ki la khlad noh ha katei ka jingjia. Kane ka jingjia ba sngewsih ka la ktah jur ïa ka jingïalehkai phutbol ha kylleng ka pyrthei, ha kaba ki jingsngewlem ki la tuid na ki nongkyrshan, ki klob, bad ki para nongïalehkai.
Kum ban shu pynkynmaw, u Diogo Jota u la pynïasoh ïalade bad ka Liverpool ha u snem 2020 na ka Wolverhampton Wanderers ha ka jingsiew kaba la kot sha €44.7 million. Ha ka por ba u dang ïalehkai ha ka Liverpool, u la mih madan haduh 182 sien, thep 65 kol bad ïarap pynbuh bol 26 sien. U la long u nongïarap ha ki jingjop dangshen jong ka Liverpool, kynthup ha ka Premier League, FA Cup, bad ka League Cup. La tip ïa u na ka bynta ka jingstet, ka jingtbit bad ka jinglah ban thep kol, u Jota dei u briew uba la ïeid bha hapdeng ki nongkyrshan bad ki paralok. Ka jingkhlad noh jong u khlem dei por ka la long ka jingduh kaba khraw ïa ki nongkyrshan kylleng ka pyrthei, hynrei ïa ka jinglong jong u ha madan yn ïai kynmaw ha ki snem ban wan.
