Shillong, Naitung 03
U Myntri ba khmih ïa ka tnat Bording, u AT Mondal, u la kyntait ïa ka jingdawa u Nongïalam ka Liang Pyrshah u Dr. Mukul Sangma ban thung da ka kynhun tohkit halor ka jingkiew ka bailut ban pyndep ïa ka project pynmih bording ka Ganol Hydel Power Project.
Haba kren sha ki lad pathai khubor ha ka Sngi Palei, u Mondal u la ong ba ïa ka jingkiew ka bai lutksan ban pyndep ïa ka Ganol Hydel Power Project la dep ban bishar bniah shwa da ka IIT Guwahati bad la mynjur ruh da ka ophis ba la ithuh da ka AG ka Jylla.
“Ngam ïohi ba kan don kano-kano ka jingleh tuh ban pynkiew ïa ka bai lutksan ban pyndep ïa ka Ganol Hydel Power Project. Ha kano-kano ka project pynmih bording, la ka dei ha Meghalaya ne ha kano-kano ka jylla ka ri, ka jingkiew ka bai lutksan kan don beit hynrei ha shuwa ban mynjur ïa ka dor, hap donkam ban phah eksamin shwa ha ki bor laitluid bad na ka bynta ka Ganol la phah leh ha ka IIT Guwahati,” la ong u Mondal.
Haba kylli halor ka jingkiew ka bai pyndep ïa ka Ganol, u Myntri u la ong ba hapdeng ka jingpyntrei ïa ka Project ka la don ka jingpynkylla ïa ki kam khamtam ïa ki jingpynwan dur jong ka dam haba ïadei bad ka rukom pyntuid ïa ka um sha ki kor (Turbine) pynmih bording.
U Mondal u la ong ba ka CWC jong ka Sorkar Pdeng ka la ai jingmut ba donkam ban shna da ka tunnel ban pyntuid ïa ka um sha ki ‘Turbines’ bad kane ka dei kawei ka nuksa ba don ka jingpynkylla ïa ki jingtei wat hapdeng ka jingpyntrei ïa ka project.
“Wat la ngi la pynkiew ïa ka bailut ban pyndep ïa ka Ganol, ïa ka jinglut la phah bishar bniah shwa sha ka IIT Guwahati hadien kata la bishar shwa ruh da ka ophis ba la ithuh da AG ka Jylla bad ïa ka jingtyrwa la rah sha ka jingïalang kynhun Myntri Sorkar kaba la ai jingmynjur ïa ka jingtyrwa,” u la ong.
U Myntri u la pynksan ba ka jingpynkiew ïa ka bailut ban pyndep ïa ka Ganol kan don hi ka jingktah ha ka pisa-pilaiñ hynrei kane ka jingpynkiew ïa ka jinglut ka ïarap ruh ban pynjlan ïa ka rta jong ka Ganol Hydel Power Project ka ban ai jingmyntoi ïa ki paidbah bad ïa ka Jylla baroh kawei.
